Depýtat Rınat Zaıyt anımasıalyq fılmderge bólingen qarajat ózin aqtamaı otyrǵanyn aıtyp synady, - dep habarlaıdy Aqshamnews.kz tilshisi.
Májilis otyrysynda depýtat Rınat Zaıyt mádenıet jáne aqparat mınıstri Aıda Balaevaǵa anımasıalyq fılmderge qatysty saýal joldady.
"Bizdiń batyrlarymyz ben handarymyzdy nasıhattaıtyn birde-bir múltfılm bar ma?! Men áli kúnge deıin kórgen joqpyn. Aýylda bir aýyz oryssha bilmeıtin ata-ananyń balasy qaıdan oryssha saırap júr dep renjeımiz. Óıtkeni búkil anımasıalyq fılmder sol tilde. Qazaqstanda 5 jylda 1,4 mıllıard teńgege Qazaqfılm 47 anımasıalyq fılm jasady degen esep bar. Mundaı qarjylandyrýdan keıin serpilis bolýy kerek edi ǵoı. Bolǵan joq! 47 fılmniń 4-eýi ǵana telearnalardan kórsetildi, qalǵana eshqaıda shyqqan joq. Nege anımasıaǵa bólingen aqshaǵa ilgerileý joq?" - dedi ol.
Aıda Balaeva, alǵash kezde ónim bolmaǵanyn, keıin 47 ónimdi kópshilikke kórsetý úshin quqyqtyq negizdiń bolmaǵanyn aıtty.
"Óıtkeni eń basty halyqaralyq shart boıynsha mundaı ónimder ártúrli deńgeıdegi halyqaralyq festıváldiń sheńberindegi baıqaýlardan ótýi kerek. Bul jumys júrgizilip jatyr. Barlyq festıválde jartysy ótti, qalǵany qatysyp jatyr. Týyndylardy sıfrlyq marketıń, arnaıy strımıng platforma arqyly taratý júıesi bolǵan joq. Ony biz byltyr qolǵa aldyq. Qazir jańa ónimder 25-i "Qazaqstan" telekanalynda, 69-y "Habar" telekanalynda ornatyldy. YouTube-te "Qazaqfılm" ártúrli jylda túsirgen 10 ónim ornalastyryldy. Budan bólek, túrli oqý oryndarynda kórsetýdi qolǵa alyp jatyrmyz", - dep jaýap berdi ol.
Premer-mınıstrdiń orynbasary Ermek Kósherbaev Rınat Zaıyttyń synyn oryndy dep atady.