15-16 naýryz aralyǵynda Qytaıdyń Taıan qalasynda taekvondodan Parıj Olımpıadasyna joldama taratatyn Azıa aımaqtyq irikteý týrnıri bolady, dep habarlaıdy almaty-akshamy.kz.
Qurlyq dodasynda 33 elden kelgen 96 sportshy qatysady. Týrnırge Qazaqstannan jastar arasyndaǵy álem chempıonatynyń qola júldegeri (2022), Spartakıada jeńimpazy, 17 jastaǵy Batyrhan Tóleýǵalı (80 kg), Samırhon Ababakırov (58 kg) qatysady. Samırhon 20 jasta. Ol – Olımpıada reıtıńinde 39-orynda tur. Sonymen birge Vİ jazǵy Spartakıadasynyń jeńimpazy, Olımpıada reıtıńinde 44-orynda kele jatqan 19 jastaǵy Marıa Sevostánova (57 kg) men Azıa oıyndarynyń eki dúrkin júldegeri, Olımpıada reıtıńinde 14-oryn turǵan 33 jastaǵy Jansel Denız (+67 keli) kúsh synasady.
Taıandaǵy týrnırde ár salmaqta fınalǵa shyqqan sportshylarǵa lısenzıa beriledi.
Alǵashqy jarys kúni erler 68 kg, 80 kg, al áıelder 49 kg, 67 kg deıingi salmaqta joldamaǵa talasady. Ulttyq qurama sapynan erteń tek Batyrhan Tóleýǵalı daıangqa shyǵady. Ol jerebe tartý kezinde V tobyna tústi. Batyrhan birinshi aınalymda Akshaı Hýdamen (Úndistan) kúsh synasady. Jeńiske jetse, jartylaı fınalda oǵan Indonezıa nemese Saýd Arabıasynyń taekvondoshysy qarsylas bolady.
Barlyǵy 80 kg deıingi salmaqta 9 sportshy bar. Búgin olar resmı salmaq ólsheýden ótti.
Daıyndyǵym josparǵa saı ótti. Týrnırge daıynmyn. Iá, bul jarystyń orny bólek ekeni aıtpasa da túsinikti. Olımpıalyq oıyndarda baq synaý kez kelgen sportshynyń armany. Erteń barymdy salamyn. Úndistandyq sportshymen alǵash ret jolyǵaıyn dep turmyn, – dedi Batyrhan Tóleýǵalı Sportty damytý dıreksıasynyń baspasóz qyzmetine bergen suhbatynda.
Qytaıdaǵy jarys kezinde Parıj Olımpıadasynyń joldamasyna ár salmaqta fınalǵa shyqqan eki sportshy ıe bolady.
Qazaqstan 2004 jyldan beri Olımpıadaǵa taekvondodan turaqty túrde sportshy aparyp keledi. Osy ýaqytqa deıin elimiz Olımpıadada bir júlde aldy. Beıjiń Olımpıadasynda Arman Shylmanov qola medaldi ıelendi.