Ulttyq ulan bólimsheleri qarý-jaraqty izdeý men kentti tazartý tapsyrmalaryn oryndady
Memleket basshysy Qasym-Jomart Toqaevtyń kúshtik qurylymdardy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý jónindegi tapsyrmalaryn oryndaý sheńberinde Jetisý oblysyndaǵy áskerı polıgonda Desanttyq-shabýyldaý áskerleriniń bólimsheleriniń taktıkalyq oqý-jattyǵýlary jáne jergilikti atqarýshy organdarnyń "Beket-2023" vedomstvoaralyq taktıkalyq oqý-jattyǵýy ótkizildi, dep habarlaıdy Almaty-akshamy.kz.
Oqý-jattyǵýdyń belsendi kezeńin Qorǵanys mınıstri, general-polkovnık Rýslan Jaqsylyqov, Jetisý oblysynyń ákimi Beıbit Isabaev, Ulttyq ulannyń bas qolbasshysy, general-maıor Erkin Botaqanov jáne ózge de kúshtik qurylymdardyń ókilderi baqylady.
Jattyǵýǵa Desanttyq-shabýyldaý áskerleriniń quramalary, Ulttyq ulannyń, Ulttyq qaýipsizdik komıteti Shekara qyzmetiniń, Tótenshe jaǵdaılar mınıstrliginiń áskerı bólimderi men bólimsheleri, quqyq qorǵaý jáne jergilikti atqarýshy organdar tartyldy.
Bólimsheler jaýyngerlik maqsattaǵy aýdandarǵa joryq jasap, búrkemeleý, áskerler men basqarý pýnktteriniń tózimdiligin arttyrý máselelerin pysyqtady. Belsendi kezeńde eldi mekendi bosatý boıynsha oqý-jaýyngerlik is-qımyldar júrgizildi.
Oqý-jattyǵý josparyna sáıkes, Shekara qyzmetiniń áskerı qyzmetshileri shekara ýchaskeleriniń birinen qarýly adamdar tobyn baıqaıdy. Utqyr toptar shartty shekara buzýshylardyń bir bóligin quryqtaıdy. Bul kezde qalǵandary jaqyn mańdaǵy eldi mekende jasyrynyp úlgeredi.
İshki ister mınıstrliginiń polısıa departamenti jergilikti atqarýshy organdar ornalastyrǵan suryptaý pýnkti aýdanyna beıbit turǵyndardy evakýasıalaýdy uıymdastyrdy.
Muqıat tekserýden keıin evakýasıalanǵan adamdardy ýaqytsha ustaý pýnktine alyp baryp, ol jerde olarǵa alǵashqy medısınalyq jáne psıhologıalyq kómek kórsetilip, birinshi kezektegi qajetti zattar berildi.
Desanttyq-shabýyldaý bólimsheleri artılerıa men armıalyq, maıdandyq avıasıanyń qoldaýymen eldi mekendi qorshaýǵa alyp, qarsylastyń atys núkteleri men bekinisterin joıdy.
Ulttyq ulan bólimsheleri qarý-jaraqty izdeý men kentti tazartý tapsyrmalaryn oryndady.
– Bul oqý-jattyǵýlardyń birqatar ereksheligi bar. Onyń ishinde basqa da áskerlermen jáne áskerı quralymdarmen ózara is-qımylda jaýyngerlik mindetterdi sheshý, áskerı bólimderdiń ózin-ózi qamtamasyz etý jáne derbestik deńgeıin tekserý, sondaı-aq qazirgi zamanǵy qarýly qaqtyǵystardyń tájirıbesin eskere otyryp, jaýyngerlik is-qımyldardy júrgizý nysandary men tásilderin jetildirý bar, – dep atap ótti shtab bastyǵy. – Desanttyq-shabýyldaý áskerleri qolbasshysynyń birinshi orynbasary, polkovnık Almas Isabekov.
Jattyǵýdyń negizgi maqsaty – gıbrıdti qaýip-qater jaǵdaıynda áreket etýge, ártúrli proksı-kúshterge qarsy turýǵa daıyndyq.
Jalpy jattyǵýǵa 2000-nan astam áskerı qyzmetshi men myń jarymnan asa qarý-jaraq pen áskerı tehnıka, onyń ishinde armıalyq, áskerı-kóliktik, maıdandyq avıasıa jáne ushqyshsyz ushý apparattary qatysty.
İs-shara sońynda Qorǵanys mınıstri oqý núktelerinde bolyp, dalalyq basqarý pýnktin, tehnıkalyq jáne tyldyq qamtamasyz etýdiń jaı-kúıin, jeke quramdy joǵary dáldiktegi qarý men ushqyshsyz ushý apparattarynan qorǵaý sapasyn tekserdi.
General-polkovnık Rýslan Jaqsylyqov Desanttyq-shabýyldaý áskerleri men RHB-qorǵanys bólimsheleriniń quraldary men tehnıkasyn qarap shyqty. Sondaı-aq, mınıstrge jaýyngerlik tehnıkalar legin shartty qarsylastyń barlaý júrgizip, soqqy beretin ushqyshsyz ushý apparattarynan búrkemeleýdiń tıimdi ádisteri kórsetildi.
Bul Joǵarǵy Bas qolbasshynyń rezervi bolyp tabylatyn Desanttyq-shabýyldaý áskerleriniń alǵashqy jattyǵýy ekenin atap ótý kerek. Ótken jyly áskerler Qarýly kúshterdiń derbes tegi retinde qaıta qurylǵan bolatyn.