Búgin jobaǵa qatysýǵa ótinim qabyldaý bastalyp, 10 kúnge sozylady. Grant alýǵa basty úmitkerler – jumyssyz azamattar men jeke kásipkerler
Kásipkerlik negizderin oqý boıynsha jobany QR Eńbek jáne halyqty áleýmettik qorǵaý mınıstrligi janyndaǵy Óńirlik jumyspen qamtý ortalyqtary iske asyryp jatyr, dep habarlaıdy Almaty-akshamy.kz.
Almaty ÓKP Shaǵyn jáne mıkrobızneste biliktilikti damytý jónindegi jetekshi sarapshy Abzal Ómirbaı grant qajetti jabdyq, eńbek quraldary, tehnologıalyq jabdyq, janýarlar, tórt túlik, qus, aǵash kósheti, butaly ósimdikter, tuqym, kóshet satyp alý, jańa bıznes ıdeıalardy iske asyrýǵa qajet orynjaıdy jalǵa alýǵa beriletinin aıtty.
«Granttar kásip bastaýǵa beriledi. Nesıe tóleý, turǵyn úı, jer ýchaskesin satyp alý syndy tutynýshylyq maqsattar qarastyrylmaıdy. Keńes alý úshin ÓKP Kásipkerlerge qyzmet kórsetý ortalyǵyna kelýge bolady», – dedi Abzal Ómirbaı.
Jeke kásipker Merýert Baılenova - «Bastaý Bıznes» jobasynyń túlegi. Mamandyǵy boıynsha pedagog balalarǵa qosymsha sabaq berý, saýat ashý salasynda bıznesin júrgizip jatyr.
«Bastaý bıznes» grantyn byltyr 2022 jyly utyp aldym. Portal óte qolaıly jasalǵan. Qarapaıym, júıeli túrde ret-retimen túsinikti jasalǵan. Bıznes jobamdy ózim jazdym, esh qıyndyq bolmady. Negizi 2021 jyly jazǵam. Ol jyly grant uta almadym. Ár barǵan saıyn qoıǵan suraqtaryna, aıtqan eskertýlerine qaraı tolyqtyryp otyrdym. Sońynda qandaı suraq qoısa da jaýabym daıyn turdy. Sóıtip, 1 225 200 teńge grant utyp aldym. Qazir bıznesimdi keńeıttim, tabysym da kóbeıdi. Grant utamyn degenshe qanshama kásipkerlermen aralastym, oıym ózgerdi, tájirıbe jınadym. Kásip bastaý op-ońaı, tabysty bolatyndaı júrgizip ketý úshin biraz keńes kerek. Birinshi qıyndyqty synyp qalmaý qajet», – dep pikirin bólisti shaǵyn kásipker Merýert Baılenova.
Kásipker ótinim qalaı tapsyrý, bıznes-jospardy qurý, sondaı-aq baǵdarlamalar jaıynda aqparatty Óńirlik kásipkerler palatasynan aqparat alatynyn aıtty.
«Bir jobaǵa qatysyp, kásip júrgizýdi úırený sonymen qatar kásip bastaýǵa grant alýǵa bolady. Bul jaqsy múmkindik. Ótinim berýge on kún berilgen. Sonymen qatar joba boıynsha buryn oqýǵa qatysqan azamattar qolyndaǵy merzimi úsh jyldan aspaǵan sertfıkatymen grant alýǵa ótinim bere alady», – dedi Almaty qalasy kásipkerler palatasynyń tóraǵasy Áýez Taıymbetov.
Bıyl «Bastaý Bıznes» jobasy boıynsha tórt lek qarastyrylǵan.