Almatyda «Qoǵamdyq pikir» qoǵamdyq qorynyń uıymdastyrýymen baspasóz konferensıasy ótti. Onda uıym músheleri el azamattaryn saılaýda belsendilik tanytyp, baqylaýshy bolýǵa shaqyrdy.
«19 naýryz kúni Májilis jáne máslıhat depýtattaryn saılaý ótedi. Bul - bizdiń elimiz úshin úlken saıası naýqan. Onda arnaıy akredıtasıadan ótken, 18 jasqa tolǵan Qazaqstan azamattary baqylaýshy bola alady. Osyǵan oraı, «Qoǵamdyq pikir» qoǵamdyq qory óz jumysyn bastaıdy. Biz qoǵamǵa óz úlesin qosqysy keletin azamattarymyzdy bizdiń uıymnyń daıyndyǵynan ótip, baqylaýshy bolýǵa shaqyramyz. Bizdiń basty mindetimiz – saılaýdyń ádil ótýi. Sondyqtan baqylaýshylar daýys berip jatqan búletenderdiń sanyna, sapasyna durystap qaraǵany jón dep oılaımyn», – dedi «Qoǵamdyq pikir» uıymynyń múshesi, PhD mamany Áshiráli Smanov.
«Qoǵamdyq pikir» qoǵamdyq qorynyń taǵy bir múshesi ári jas ustaz Dıana Malaeva baqylaýshylardy arnaıy daıyndaý arqyly jastar arasynda saıası-quqyqtyq mádenıet qalyptastyrýdy maqsat etetinderin aıtty.
«Bizdiń uıym ótken saılaýda baqylaýshylardy daıyndap, biraz tájirıbe aldy. Bul tájirıbeni aldaǵy saılaýda da tıimdi paıdalanýǵa nıettimiz. Bizdiń uıymǵa júgingen baqylaýshy bolýǵa nıetti adamdardy barlyq qajetti ereje-talaptarmen tanystyramyz. Negizgi maqsatymyz – jastar arasynda quqyqtyq mádenıet qalyptastyrý. Olar ózderiniń mindetterin, zańdy quqyqtaryn bilýi qajet. Aldaǵy saılaýda baqylaýshy bolý – jastarǵa taptyrmas saıası tájirıbe», – dedi ol.