QR Qarjy mınıstrliginiń Memlekettik kirister komıteti turǵyn úıdi jalǵa beretin tulǵalarǵa salyq mindettemelerin oryndaý qajettigin eskertti, dep habarlaıdy Almaty-akshamy.kz
Vedomstvo málimetinshe, jeke kásipker (budan ári - JK) retinde tirkelmegen jalǵa berýshiler salyq mindettemelerin biryńǵaı jıyntyq tólemdi (budan ári - BJT) tóleý jolymen nemese jeke tabys salyǵy boıynsha deklarasıany (budan ári - JTS) usyný jolymen oryndaı alady. Jeke kásipker turǵyn úıdi jalǵa berý kezinde búdjetpen esep aıyrysý kezinde patent nemese ońaılatylǵan deklarasıa negizinde arnaýly salyq rejımin (budan ári - ASR) paıdalanýǵa quqyly.
Bul rette ádisterdiń árqaısysynyń ózindik artyqshylyqtary men shekteýleri bar. Atap aıtqanda, turǵyn úıdi jalǵa beretin jáne jeke kásipker retinde tirkelmegen tulǵalar jyl saıyn esepti salyq kezeńinen keıingi jyldyń 31 naýryzynan keshiktirilmeıtin merzimde jeke tabys salyǵy boıynsha deklarasıany (240.00-nysan) tabys etedi. Deklarasıany tapsyrý úshin belgilengen merzimnen keıin kúntizbelik on kúnnen keshiktirilmeıtin merzimde alynǵan tabystyń 10 paıyz mólsherinde jeke tabys salyǵyn tóleıdi.
Jeke tulǵalar jeke tabys salyǵy boıynsha deklarasıany (240.00-nysan) «E-Salyq Azamat» mobıldi qosymshasy nemese cabinet.salyk.kz web-portalynda Salyq tóleýshiniń kabıneti arqyly tapsyra alady. Eger turǵyn úı salyq agentine (jeke kásipker, jeke praktıkamen aınalysatyn tulǵa, zańdy tulǵa, onyń qurylymdyq bólimsheleri, rezıdent emes zańdy tulǵa) jalǵa berilgen jaǵdaıda jeke tabys salyǵyn esepteýdi, ustap qalýdy jáne búdjetke tóleýdi salyq agenti tólem kózinen júzege asyrady.
Jeke tulǵalar salyq mindettemelerin respýblıkalyq jáne oblystyq mańyzy bar qalalardyń, astananyń turǵyndary úshin 1 AEK jáne qalǵan eldi mekenderdiń turǵyndary úshin 0,5 AEK mólsherinde biryńǵaı jıyntyq tólem tóleý arqyly júzege asyra alady. Mundaı jeke tulǵalar tólem júrgizilgen kúnnen bastap tólem júrgizilgen aıdyń sońǵy kúnine deıin biryńǵaı jıyntyq tólem tóleýshiler dep tanylatyn bolady. Bul rette biryńǵaı jıyntyq tólem tóleýshiniń kúntizbelik jyl ishindegi tabys mólsheri 1 175 eselengen AEK-ten aspaýy tıis.
Patent nemese ońaılatylǵan deklarasıa negizinde arnaýly salyq rejımin qoldanatyn jeke kásipker tıisinshe alynǵan kiristiń 1 nemese 3 paıyz mólsherlemesi boıynsha jeke tabys salyǵyn (2023 jylǵa deıin jeke tabys salyǵyn tóleýden bosatylǵan) esepteıdi. Sondaı-aq «Mindetti áleýmettik saqtandyrý týraly», «Zeınetaqymen qamsyzdandyrý týraly» jáne «Mindetti áleýmettik medısınalyq saqtandyrý týraly» zańdarda belgilengen mólsherlemeler boıynsha áleýmettik tólemderdi (áleýmettik aýdarymdar, mindetti zeınetaqy jarnalary, MÁMS jarnalary men aýdarymdary) tóleıdi.
QR «Ákimshilik quqyq buzýshylyq týraly» kodeksiniń 272 jáne 275-baptaryna sáıkes, salyq eseptiligin usynbaý, sondaı-aq salyq salý obektilerin jáne salyq eseptiliginde kórsetilýge jatatyn ózge de múlikti jasyrý ákimshilik jazaǵa, onyń ishinde aqshalaı aıyppul túrinde óndirip alýǵa ákep soǵady», - dep eskertedi komıtetten.