Prezıdentke ekonomıkanyń mańyzdy salalaryn monopolıadan aryltý jóninde usynystar berildi
Memleket basshysyna Básekelestikti qorǵaý jáne damytý agenttiginiń tóraǵasy Serik Jumanǵarın esep berdi, dep habarlaıdy Almaty-akshamy.kz Aqorda saıtyna silteme jasap.
Qasym-Jomart Toqaevqa Qazaqstan ekonomıkasyn monopolıadan aryltý jónindegi reformalar aıasynda Agenttikke berilgen tapsyrmalardyń oryndalýy týraly baıandaldy.
S.Jumanǵarınniń aıtýynsha, prokýratýra organdary men Agenttik suıytylǵan munaı gazyn kóterme saýdada satatyndardyń qyzmetine júrgizilgen tekserý nátıjeleri boıynsha 5,5 mıllıard teńge qarjyǵa qatysty zań buzýshylyqtardy anyqtaǵan. Avtomobıl gazyn bólshek saýdaǵa shyǵaratyn 193 satýshy mekemege salynǵan aıyppul kólemi 103 mıllıon teńgeni qurady. Agenttiktiń usynysy boıynsha Energetıka mınıstrliginiń suıytylǵan munaı gazyn, baǵanyń 10 paıyzdyq shegin 3 paıyzǵa deıin túsirýdi qosa alǵanda, elektrondy saýda alańdary arqyly uıymdastyrý jáne satý tártibine ózgerister engizildi.
Qazirgi ýaqytta «Eurotransit Nur Zholy», «Qazfosfat», «Qazaqmys» Korporasıasy» jaýapkershiligi shekteýli seriktestikterine jáne «Kaskor-Transservıs» aksıonerlik qoǵamyna qatysty tergeý amaldary júrgizilýde. «QTJ» UK», «Qazaqtelekom», «Aımaq» QTA», «Transtelekom» sıaqty aksıonerlik qoǵamdarda, sondaı-aq azyq-túlik taýarlaryn satatyn saýda oryndaryn jalǵa berý qyzmetterine qatysty saýda naryqtarynda monopolıaǵa qarsy zańnamanyń buzylý belgilerin anyqtaý úshin taldaý júrgizilýde.
Prezıdenttiń monopolıalyq toptarǵa keshendi taldaý júrgizý jónindegi tapsyrmalaryn oryndaý úshin Básekelestikti qorǵaý jáne damytý agenttiginiń tóraǵasy munaı jáne munaı ónimderi, tabıǵı gaz, elektr energıasy naryqtaryn, temirjol kóligi, azamattyq avıasıa qyzmetteri, qoǵamdyq kólik, telekomýnıkasıalar, qarjy naryqtaryn monopolıadan aryltý jóninde usynys berdi. S.Jumanǵarın negizgi taýar naryqtaryn monopolıadan aryltýǵa jáne bıznes úshin qolaıly básekelestik orta qalyptastyrýǵa baǵyttalǵan Básekelestikti damytýdyń 2022-2026 jyldarǵa arnalǵan tujyrymdamasynyń jobasyn ázirleý barysy jóninde de baıandady.
Memleket basshysy Qazaqstannyń bolashaǵy úshin básekelestikti damytýdyń mańyzy zor ekenin atap ótip, ekonomıkanyń mańyzdy salalaryn monopolıadan aryltý jónindegi júıeli sharalardy iske asyrý jumystaryn jalǵastyrýdy jáne olardyń sapaly oryndalýyna baqylaýdy qamtamasyz etýdi tapsyrdy.