4 maýsym - tynyshtyq kúni ekenin eskertti.
Maýsymnyń 4 kúni saǵat 00:00-de referendým aldyndaǵy úgit júrgizý aıaqtalady. Bas prokýratýra ókili Bolat Dembaev «tynyshtyq kúni» tártip buzǵandardyń jaýapkershilikke tartylatynyn eskertedi, dep habarlaıdy Almaty-akshamy.kz.
«Erteń, 4 maýsymda saǵat 00:00-de referendým aldyndaǵy úgit júrgizý aıaqtalady...Bul úgitke, sonyń ishinde qoǵamdyq pikirge suraý salý nátıjelerin nemese referendým nátıjeleriniń boljamdaryn jarıalaýmen ushtasqanǵa referendým ótkiziletin kúnniń aldyndaǵy kúni jáne ol ótkiziletin kúni, ıaǵnı aǵymdaǵy jyldyń 4 jáne 5 maýsymynda tyıym salynady (Konstıtýsıalyq zańnyń 7-babynyń 4-tarmaǵy). Osy kúnderi – úgitke tyıym salynǵan kezeńde ol júrgizilgen jaǵdaıda Qazaqstan Respýblıkasynyń Ákimshilik quqyq buzýshylyq týraly kodeksiniń 102-baby boıynsha jaýaptylyq týyndaıdy», - delingen málimdemede.
Onyń aıtýynsha, ıaǵnı úgit-nasıhatqa tyıym salynǵan kezeńde bul is-sharalar júrgizilgen jaǵdaıda QR Ákimshilik quqyq buzýshylyq týraly kodeksiniń (ÁQBtK) 102-baby boıynsha jaýapkershilik eskerilgen.
«Eki nemese odan da kóp ret nemese basqa bireý úshin daýys berý, sondaı-aq ýchaskelik referendým komısıasy múshesiniń azamattarǵa ózge adamdar úshin daýys berýge múmkindik jasaý maqsatynda búletenderdi berý áreketi ÁQBtK-niń 108 jáne 110-baptary boıynsha jaýaptylyqqa ákep soǵatynyna da nazar aýdaramyz», - deıdi Bas prokýrordyń orynbasary.
Onyń sózine qaraǵanda, Konstıtýsıaǵa (83-bap) sáıkes, prokýratýra organdary referendýmǵa daıyndyq pen ony ótkizýdiń barlyq satylarynda zańdylyqtyń saqtalýyna joǵary qadaǵalaýdy qamtamasyz etip otyr. Atalǵan máselelerdi eskere otyryp, Bas prokýratýra zańdylyqty qamtamasyz etý jáne quqyq buzýshylyqtardyń aldyn alý maqsatynda azamattardy, qoǵamdyq birlestikter men buqaralyq aqparat quraldaryn qoldanystaǵy zańnamany qatań saqtaýǵa shaqyrdy.