Prezıdent Qasym-Jomart Toqaevqa Bas prokýror Berik Asylov elimizdegi zańdylyqtyń saqtalý jaǵdaıy men júrgizilgen qadaǵalaý jumystary týraly esep berdi, dep habarlaıdy Almaty-akshamy.kz Aqordaǵa silteme jasap.
Berik Asylov Abaı oblysyndaǵy órt deregi boıynsha qozǵalǵan qylmystyq iske qatysty tergeý amaldary jóninde baıandady. Bas prokýrordyń orynbasarynyń basshylyǵymen quqyq qorǵaý jáne arnaýly organdardyń tájirıbeli qyzmetkerlerinen vedomstvoaralyq jedel-tergeý toby quryldy. Tergeý qorytyndysy boıynsha laýazymdy tulǵalardyń áreketteri men áreketsizdigine quqyqtyq baǵa beriledi.
Memleket basshysyna rezonans týdyrǵan qylmystyq isterdi tergeý jáne qoǵam múddesin qorǵaý jónindegi jumystardyń qorytyndysy týraly da málimet berildi. Áleýmettik-ekonomıkalyq salalardy tekserý nátıjesinde 11 myń adam túrli deńgeıde jaýapqa tartyldy. Tergeý amaldary júrgizilgennen keıin búdjetke 10 mıllıard teńge qaıtaryldy. Sotta 15,2 mıllıard teńge kóleminde memleket múddesi qorǵaldy.
Budan bólek, Qasym-Jomart Toqaevqa bıznesti qorǵaý jáne mańyzdy ınvestısıalyq jobalardy qoldaý jónindegi tapsyrmalarynyń oryndalý barysy týraly da baıandaldy. Atap aıtqanda, Bas prokýratýranyń bastamasymen 2 myńǵa jýyq kásipkerge zańsyz tekserý júrgizýdi kózdegen ártúrli mınıstrliktiń 9 buıryǵynyń kúshi joıyldy. Sondaı-aq 2,5 mıllıard teńge óndirip alý jónindegi 21 myń salyq buıryǵy zańsyz dep tanyldy.
Sonymen qatar Bas prokýror Prezıdentke qylmystyq ahýal jáne qylmystyq-quqyqtyq saladaǵy azamattardyń konstıtýsıalyq quqyqtaryn saqtaý úshin qabyldanyp jatqan sharalar týraly aıtty.
Kezdesý sońynda Memleket basshysy Abaı oblysyndaǵy órttiń mán-jaıyn obektıvti túrde tergeý mańyzdy ekenine toqtalyp, elimizdiń áleýmettik jáne ekonomıkalyq salalaryndaǵy zańdylyqtyń saqtalýyn qamtamasyz etý jóninde birqatar naqty tapsyrma berdi.