Memleket basshysynyń tapsyrmasy boıynsha búgingi kúni jergilikti aýqymdaǵy tótenshe jaǵdaı rejımi jarıalanǵan 10 oblysta ýákiletti memlekettik organdar saldarlardy joıý jáne azaıtý, jańa aýmaqtardy sý basýǵa jol bermeý jóninde sharalar qabyldap jatyr, dep habarlaıdy almaty-akshamy.kz QR Bas prokýratýranyń baspasóz qyzmetine silteme jasap.
Bas prokýratýra málimdemesi boıynsha, avarıalyq-qutqarý jumystaryna TJM, İİM, ákimdikter men basqa da qyzmetterdiń 10 myńnan astam qyzmetkeri jumyldyrylǵan. Aqtóbe, Batys Qazaqstan, Qostanaı jáne Atyraý oblystarynda jaǵdaı kúrdelene túsken.
«Prokýratýra organdary naqty eldi mekenderdi sý basý, joldardyń, kópirlerdiń, gıdrotehnıkalyq jáne basqa da obektilerdiń qıraý sebepterin belgileıdi. Atap aıtqanda, búdjet qarajatynyń maqsatty jumsalýy, sý tasqynynyń aldyn alý jónindegi josparlardyń ýaqtylyǵy men tolyqtyǵy zerttelýde. Qorytyndysy boıynsha árbir ýákiletti organnyń qyzmetine tıisti quqyqtyq baǵa beriletin bolady, - dedi QR Bas prokýratýrasynyń resmı ókili Erlan Janpeıisov.
Atalǵan maman sondaı-aq búgingi tańda prokýrorlar Aqtóbe, Almaty jáne Atyraý oblystarynda sotqa deıingi 4 tergep-tekserýdi bastaǵanyn atap ótti.
«Jergilikti jerlerdegi prokýrorlar quqyq qorǵaý organdarynyń zańdylyq pen quqyqtyq tártip rejımin qamtamasyz etý jónindegi qyzmetin úılestiredi. Problemalyq ýchaskelerdi qorshaý jáne patrúldeý, azamattardyń múlkin qorǵaý qamtamasyz etilgen. Osy qıyn kezeńde azamattardy dúrbeleńge túspeýge shaqyramyz, árbir zardap shekken otbasyna qoldanystaǵy zańnamaǵa sáıkes tolyq kólemde kómek kórsetiledi. Bul másele prokýratýra organdarynyń turaqty baqylaýynda. Ótemaqy alý algorıtmi Úkimettiń qaýlysymen bekitilgen arnaıy erejelermen naqty rettelgenin túsindiremiz. Jergilikti atqarýshy organdar birjolǵy materıaldyq kómek tóleýge kiristi», - dedi ol.
Bas prokýratýranyń resmı ókili sý tasqynyn oqshaýlaý jáne qalpyna keltirý jumystary jalǵasyp jatqanyn, sondaı-aq el turǵyndaryn tek resmı aqparat kózderine senýge, jalǵan aqparat taratpaýǵa shaqyrdy.
«Jalpy, barlyq ýákiletti memlekettik organdar men quqyqtyq tártip organdary eriktilerdiń qoldaýymen kúsheıtilgen rejımde jumys isteýde. Sý tasqynyn oqshaýlaý jáne qalpyna keltirý jumystary jalǵasýda. Qalyptasqan jaǵdaı aıasynda halyq pen BAQ-ty jalǵan aqparat taratýdan bas tartýǵa jáne tek resmı aqparat kózderine senýge shaqyramyz. Jalǵan aqparatty ornalastyrý, taratý ákimshilik jáne qylmystyq jaýaptylyqqa ákep soǵady. Quqyqtyq sıpattaǵy barlyq máseleler boıynsha, onyń ishinde zalaldy óteý bóliginde Siz turǵylyqty jeri boıynsha prokýratýra organdaryna júgine alasyz. Sizge mindetti túrde kómek kórsetiledi», - dedi Erlan Janpeıisov.