10 jylda Vladıslav shyn máninde ne bolǵany týraly bir sóz aıtpaǵan, qazir bárin aıtyp bergen.
Bas prokýratýranyń qyzmetkeri ómir boıyna sottalǵan Vladıslav Chelahtan jaýap aldy, dep habarlaıdy Almaty-akshamy.kz Elmedia-ǵa silteme jasap.
«Jalpy, Vlad juma saıyn bizge habarlasady. Eger maǵan habarlaspasa, týystarynyń birine habarlasady. Keshe bizge habarlasqan joq. Azdap ýaıymdaı bastadyq. Búgin habarlasyp, keshe apparattyń isten shyqqanyn aıtty. Ol Bas prokýratýradan bir jas qyzmetker kelgenin, esimi esinde qalmaǵanyn, osy prokýror ózinen eki kún jaýap alǵanyn aıtty. Vladıslav oǵan aıtqysy kelgeniniń bárin aıtqanyn, iske qatysy bar adamdardyń barlyǵynyń esimin atap, esimin bilmeıtinderin aýyzsha sıpattap bergenin jetkizdi. Buǵan deıin Bas prokýratýradan basqa prokýror isti suratyp alǵan», – dedi sottalýshynyń anasy Svetlana Vashenko.
Áıeldiń aıtýynsha, sońǵy 10 jylda Vladıslav «shyn máninde ne bolǵany týraly bir sóz aıtpaǵan, qazir bárin aıtyp bergen». Degenmen 14 áriptesi men qoryqshynyń ólimine kináli dep tanylǵan jigittiń týystarymen sóılesý ýaqyty shekteýli, 2-3 mınýt qana beriledi eken.
Aıta keteıik, jaqynda Vladıslav Chelah Prezıdentke joldaǵan hatynda tergeýshilerdiń «qajetti aıǵaq alý úshin» ózin azaptap, psıhotroptyq dári-dármek qoldanǵanyn aıtqan.
2012 jyldyń 28 mamyrynda qazaq-qytaı shekarasynda ornalasqan «Arqankergen» shekara beketinde qaıǵyly oqıǵa boldy. Mamyrdyń aıaǵynda «Arqankergendegi» shekarashylarmen baılanys kenet úzilgen. Sodan keıin ol jerge jasaq jiberilgen. 30 mamyrda «Arqankergenge» jiberilgen jasaq shekara beketiniń janyp ketkenin habarlady.
Bir kúnnen keıin Ulttyq qaýipsizdik komıtetine qarasty shekara qyzmeti órtenip ketken ǵımarattan 12 adamnyń súıegi, al kelesi kúni taǵy eki shekarashynyń múrdesi tabylǵanyn málimdedi. Sondaı-aq bir qoryqshynyń máıiti tabylǵan.
4 maýsymda shekara beketinen 24 shaqyrymda ornalasqan qystaýlardyń birinde shekarashy Vladıslav Chelah ustaldy. Ol kezde qaraǵandylyq jigit 19 jasta bolǵan.
Eń alǵash ustalǵan kezde Chelah qylmysyn moıyndaǵan, biraq keıin sotta barlyǵyn joqqa shyǵardy. Ol ózine qysym jasalǵanyn, kináni moıyndaýǵa májbúr bolǵanyn, eshkimdi óltirmegenin málimdedi.
Bul is boıynsha sot úkimi 2012 jyly 11 jeltoqsanda shyqty. Sot Chelahty 15 adamdy óltirdi dep tanyp, ómir boıyna bas bostandyǵynan aıyrdy.
Chelah 2013 jyldyń naýryzynan bastap Qostanaı oblysy, Jitiqara aýdanyndaǵy ómir boıyna bas bostandyǵynan aıyrylǵan azamattarǵa arnalǵan «Qara búrkit» dep atalatyn mekemede jazasyn ótep jatyr.