Qazaqstan Respýblıkasynyń Bas prokýratýrasy memleket basshysynyń tapsyrmalaryn oryndaý maqsatynda quqyq qorǵaý jáne arnaıy organdarmen birlesip, nashaqorlyq pen esirtki saýdasyna qarsy keshendi sharalar qabyldaýda. Osy jumystar aıasynda 75 esirtki zerthanasynyń qyzmeti toqtatylyp, 87 adam, sonyń ishinde Moldova, Latvıa, Úndistan jáne basqa da elderdiń azamattary ustaldy. 1,3 tonnadan astam sıntetıkalyq esirtki tárkilendi, dep habarlaıdy aqshamnews.kz.
Quqyq qorǵaý organdary esirtki saýdasymen aınalysatyn 13 qylmystyq toptyń, onyń ishinde eki transulttyq qylmystyq toptyń áreketin áshkereledi. Sonymen qatar, «Nashaqorlyqqa jol joq» atty esirtkige qarsy is-sharalar turaqty túrde ótkizilip keledi. Nátıjesinde esirtki nasıhattaǵany úshin 17 adam ustalyp, 10 myńnan astam narko-graffıtı joıyldy.
Zamanaýı tehnologıalardyń damýy esirtki satýshylardyń ınternet-platformalardy paıdalaný arqyly zańnan tys áreketterin jasyrýyna múmkindik bergen. Osyǵan baılanysty tártip saqshylary kóbinese tek esirtki taratýshylardy (zakladchıkterdi) ǵana emes, sonymen qatar qylmystyq ıerarhıanyń joǵarǵy deńgeıindegi uıymdastyrýshylardy da áshkerleýge kiristi. Qazirgi ýaqytta esirtki saýdasynan túsken zańsyz tabysty baqylap otyrǵan «kýratorlar» men esirtki bıznesiniń basqa da uıymdastyrýshylary ustaldy.
Quqyq qorǵaý organdary esirtki bıznesiniń árbir býynyn anyqtaýǵa bel býǵan. Bul maqsatta esirtki jarnamalaýshylarynan bastap, esirtki saýdasyn uıymdastyrýshylarǵa deıingi barlyq deńgeıdegi qylmyskerlerdiń áreketteri anyqtalýda.
Bas prokýratýra azamattardy esirtki tutynýdan jáne esirtki bıznesine qatysýdan saq bolýǵa shaqyrady. Zań men tártiptiń ústemdigi qoǵam men árbir azamattyń qaýipsizdigin qamtamasyz etedi. Osy qaǵıdat saqtalǵan jaǵdaıda ǵana biz ádil, taza jáne qaýipsiz Qazaqstandy qura alamyz.