Bas Prokýror Ǵızat Nurdáýletovtiń tóraǵalyǵymen Bas prokýratýranyń keńeıtilgen alqa otyrysy ótti dep habarlaıdy almaty-akshamy.kz
Onda vedomstvonyń 2022 jylǵa arnalǵan basym baǵyttary belgilendi. Otyrysqa Bas prokýratýranyń, Quqyqtyq statısıka jáne arnaıy esepke alý jónindegi komıtettiń, Quqyq qorǵaý organdary akademıasynyń basshylyǵy, Bas áskerı jáne Bas kólik prokýrorlary, Nur-Sultan, Almaty, Shymkent qalalarynyń jáne oblystardyń prokýrorlary qatysty.
Otyrys basynda Ǵızat Nurdáýletov prokýratýra organdarynyń ótken kezeńde qylmystyq jaǵdaıdy baqylaýǵa, qylmystyq-quqyqtyq saladaǵy reformalardy ilgeriletýge, qadaǵalaýdy azamattar men bıznes problemalaryn tıimdi sheshýge qaıta baǵdarlaýǵa erekshe nazar aýdarǵanyn atap ótti.
Barlyq deńgeıdegi prokýrorlarǵa alaıaqtyqqa, qarjylyq pıramıdalarǵa, balalarǵa qarsy jynystyq qylmystarǵa jáne esirtki saýdasyna qarsy is-qımyl jónindegi Memleket basshysynyń tapsyrmalaryn sapaly oryndaýdy qamtamasyz etý tapsyryldy.
Atqarylǵan jumystar men aldaǵy kezeńge arnalǵan mindetter týraly Bas Prokýrordyń orynbasarlary esep berdi. EYDU elderiniń ozyq tájirıbesi negizinde qylmystyq prosesti kezeń-kezeńimen jańǵyrtý boıynsha Prezıdenttiń tapsyrmalaryn iske asyrý týraly baıandaldy.
Úsh býyndy modeldi engizýdiń birinshi kezeńi – negizgi prosestik sheshimderdi kelisý qylmystyq prosestiń sotqa deıingi satysynda quqyq qorǵaýshylyq kedergini belgileýge múmkindik bergeni atap ótildi.
Jyl basynan beri tergeý organdarynyń 328 myń qaýlysynyń 286 myńy ǵana zańdy dep tanyldy, al qalǵandary kelisýden bas tartylǵan nemese olar qaıta pysyqtaýǵa joldanǵan. Nátıjesinde tergeý sapasy artyp keledi, azamattardy qylmystyq sheńberge negizsiz tartýdyń alǵashqy satysynda joly kesilgen.
Sonymen qatar áleýmettik-ekonomıkalyq salada daǵdarysqa qarsy sharalardy iske asyrý, jerdi utymdy paıdalaný, azamattardy dárilik zattarmen qamtamasyz etý, qorshaǵan ortany qorǵaý, balalardyń quqyqtaryn qorǵaý jáne basqa da ózekti baǵyttar boıynsha nátıjeli tekserýler men taldaýlar júrgizildi.
Sonyń nátıjesinde prokýrorlardyń qadaǵalaý aktileri boıynsha 4,8 mlrd teńgege 880 myń gektar jer qaıtarylyp, 1027 bıznesti zańsyz tekserýdiń kúshi joıyldy. Memlekettik sanıtarıalyq dárigerlerdiń negizsiz shekteýleri bar 60 qaýly ózgertilip, zańǵa sáıkestendirildi.
Alqa qorytyndysy boıynsha qadaǵalaý vedomstvosynyń basshysy azamattardyń konstıtýsıalyq quqyqtaryn qorǵaý, qylmystylyqqa qarsy is-qımyl, halyqtyń senim deńgeıin arttyrý jáne quqyq ústemdigin qamtamasyz etý jónindegi basym mindetterdi belgiledi.