Almatyda Ulttyq olımpıada kommıtetiniń mamandary men Qazaqstan Boks federasıasynyń basshylary sońǵy álem chempıonatynda júlde alǵan boksshylardy marapattady, dep habarlaıdy almaty-akshamy.kz «Habar 24».-ke silteme jasap.
Jaqynda ǵana Serbıa jerinde ótken dúnıejúzilik dodada Qazaqstan quramasy 2 altyn, 2 kúmis, 1 qola medal ıelenip, jalpy komandalyq esepte ekinshi orynnan kóringen edi.
Táýelsizdik alǵan jyldan beri qazaq boksshylarynyń kez kelgen dúbirli dodadan qorjyny bos qaıtqan emes. Jeńiske etimiz úırenip alǵany sondaı, altyn almasaq ashýlanatyn hálge jettik. Bıyl Tokıo olımpıadasyndaǵy 2 qola medaldy da qomsynǵanymyz ras. Al Belgradqa barǵan jigitter jigerli minezimen daralanyp, jankúıerlerdiń ystyq yqylasyna bólendi. Sol dúnıejúzilik jarysta asyǵy alshysynan túsken jigitterdi búgin qaýymdastyq basshylary marapattady.
Álem chempıony bolǵan Sáken Bıbosynov pen Temirtas Júsipov 70 myń AQSH dollaryn alsa, kúmis júldegerler Mahmud Sabyrhan men Serik Temirjanovqa 50 myń, al qola júldeger Abylaıhan Júsipovke 30 myń AQSH dollary berildi. Tek qana júldegerler emes álem chempıonatyna qatysqan ózge boksshylar da 800 myń teńgeden syıaqy aldy. Bapkerler men komandanyń dárigerlerine de qarjylaı syılyq taǵaıyndalypty.
Abylaıhan áýesqoı bokstan áli kete qoıǵan joq.Taǵy da eńbek etip, shyń basyna shyǵýdy kózdeıdi. 33 jastaǵy álem chempıony Temirtas Júsipovtiń de maqsaty osy. «Bizdiń jigitter táýelsizdigimizdiń 30 jyldyǵyna úlken syı jasady. Endi kelesi jyly Azıa oıyndarynda da osy bıikten kórinemiz degen oıdamyn. Ol úshin boksshylarǵa barlyq jaǵdaıdy jasaımyz»,-deıdi federasıa prezıdenti Keńes Raqyshev.