Naýryzbaı qajy Taǵanuly mal qunyn qoldan kótermeı, halyqqa qoljetimdi baǵaǵa satýǵa shaqyrdy, dep habarlaıdy aqshamnews.kz QMDB baspasóz qyzmetine silteme jasap.
"Qoja Ahmet Iasaýı babamyz: "Haqqa qyzmet – halyqqa qyzmet" degen. Bul – halyqtyń razylyǵy Allanyń razylyǵyna jetkizedi degen sóz. Osyǵan oraı, sharýa qojalyqtarynyń ıelerin mal baǵasyn sharyqtatpaı, ádiletti baǵa usynýǵa úndeımin. Eńbektiń aqtalýy mańyzdy, degenmen "paıda oılama, ar oıla" degen dana sóz bar. Alla Taǵala Quranda: "Jasaǵan qaıyr-sadaqalaryń ózderińe tolyq qaıtarylady" dep ýáde etken" ("Baqara" súresi, 272-aıat), dedi Bas múftı.
Sondaı-aq, kásipkerlerdi áleýmettik mańyzy bar azyq-túlik baǵasyna jeńildik jasaýǵa da shaqyrdy.
"Qurban aıtta halyqqa jaqsylyq jasap, kópshiliktiń alǵysyn alaıyq. Bul – saýapty ári saǵynyshpen keletin meıram", dedi Naýryzbaı qajy Taǵanuly.
Aıta keteıik, bıyl Qurban aıt merekesi 6 maýsymda bastalady. Bul kún Hıjrı kúntizbege sáıkes belgilenip, QMDB óz sheshimin halyqaralyq ǵulamalarmen jáne pátýá shyǵarý ortalyqtarymen keńese otyryp qabyldaǵan.