Bas múftı Indonezıa ǵulamalar keńesimen birlesken málimdemege qol qoıdy.
Ózara birlesken málimdeme 2023-2026 jyldardy qamtıdy, dep habarlaıdy Almaty-akshamy.kz Elorda.info saıtyna silteme jasap.
Indonezıa astanasy Jakarta qalasynda QMDB tóraǵasy, Bas múftı Naýryzbaı qajy Taǵanuly osy eldiń Ǵulamalar Keńesi Bas tóraǵasynyń mindetin ýaqytsha atqarýshy doktor Marsýdı Sýhýd myrzamen kezdesti.
«Kezdesý barysynda birlesken málimdemege qol qoıyldy. Onda QMDB men Indonezıa Ǵulamalar keńesi álemdegi beıbitshilikti saqtaý, Islam dininiń órkendeýine úles qosý, ózara ekijaqty vebınar, konferensıa, semınar uıymdastyrý qamtyldy. Ózara birlesken málimdeme 2023-2026 jyldardy qamtıtynyn aıta ketken jón», - dep jazylǵan QMDB habarlamasynda.
Birlesken málimdemeni júzege asyrý baǵdarlamasy ekijaqty tarappen arnaıy kelisken túrde naqtylanady. Eki tarap ta yntymaqtastyqty arttyryp, Islam dinin álemge nasıhattaý, onyń ishinde Azıa aımaǵynda jańǵyrtýǵa nıetti.
Sondaı-aq málimdemege sáıkes Ǵulamalar keńesiniń birlesken jıynyn ótkizý, musylman ǵalymdar, áıelder men jastardyń pikir almasýyn qamtamasyz etý kózdelgen. Zertteýler men jarıalanymdar jasaý, stýdentterge dáris berý jáne Keńes músheleriniń tájirıbe almasýy qarastyrylǵan.