Zerttelgen álemdik tájirıbe halyqty qoǵamdyq kóliktiń jyldam túrlerimen qamtý deńgeıin arttyrý qajettigin kórsetedi. Buǵan Almatyda kólik qańqasyn engizýge arnalǵan sheber-josparǵa júrgizilgen zertteý dálel.
Qujatty ázirleýge «Almatybasjospar» ǴZI ókilderi jáne ártúrli qalalarda keshendi kólik jobalaryn iske asyrý tájirıbesi bar basqa da sarapshylar qatysty, dep habarlaıdy almaty-akshamy.kz.
Qujatty ázirleý kezinde Seýl, Sıngapýr, Parıj jáne álemniń basqa qalalarynyń úlgisi boıynsha aıaldamalarmen qamtý, aıaldamalardyń jaıaý baratyndaı jaqyn ornalasýy, avtobýstyń qozǵalys kestesiniń saqtalýy, avtobýs parkiniń turaqtylyǵy zertteldi.
Sheber-jospar avtorlarynyń júrgizgen zertteýine sáıkes, Almatyda aıaldamadan 500 m radıýsta halyqtyń 39% turady, al Parıjde bul kórsetkish 98%. Aıaldamalardyń trafıkti tartý oryndarynan qashyqtyǵy avtobýs qatynasynyń tartymdylyǵyn tómendetedi. Raıymbek dańǵylynyń soltústigindegi aýdandar metroǵa nemese t.b. kólikke qashyqtaý. Munyń sheshimi retinde metro jelisin qalanyń batys shekarasyna deıin uzartý, halyqty aıaldamalarmen tolyq qamtýdy, kóliktiń ekologıalyq tazalyǵyn 90-100%-ǵa deıin qamtamasyz etý, aıaldamada kútý ýaqytyn qosqanda, jolaýshylardy aýysyp miný ýaqytyn 2-8 mınýtqa deıin qysqartý jáne t.b. josparlanǵan.