«Barymtashylar. Ýaqyt joly» fılmi qazan aıynan bastap kórsetiledi
Atalǵan fılmde tynysh ómirdiń shyrqyn buzyp, barymtashylar otaǵasyn aıaýsyz óltirgen otbasy týraly baıandalady, dep habarlaıdy Almaty-akshamy.kz.
Kartınanyń rejıserleri - Erlan Nurmuhambetov (Qazaqstan) jáne Lıza Takeba (Japonıa).
«Japondyq rejısermen Kann kınofestıvalinde tanystym. Bul festıválge Nur-Sultan qalasyndaǵy óner ýnıversıtetiniń atynan qatysqan edim. Rejıserge fılmniń senarıi týraly aıtyp berdim, oǵan kartınanyń jelisi birden unady. Keıin telefon arqyly baılanysqa shyqtyq, ol meni japondyq prodúsermen tanystyrdy. Nátıjesinde «Qazaqfılm» kınostýdıasynyń qoldaýyn taýyp, fılmniń túsirilimine kiristik»,- dedi rejıser Erlan Nurmuhambetov.
Aıta ketsek, fılmde basty rólderdi Kann kınofestıvalinde úzdik aktrısa atanǵan Samal Eslámova, tanymal qazaqstandyq teatr jáne kıno akteri Dýlyǵa Aqmolda jáne japondyq akter Mıraı Morıama, al ákesin joǵaltqan balanyń rólin Mádı Mınaıdarov esimdi jas akter somdady.
«Men Esik qalasynyń turǵynymyn. Sol jerde akterlik kýrstan óttim. Oqýdy bitirgennen keıin bizdi kastıngke shaqyrdy, men óz taǵdyrymdy synaý úshin Almatyǵa keldim. Erlan aǵa maǵan basty róldi berdi. Maǵan kıno óte unady. Basynda qıyn boldy. Ásirese, atqa minip júrý, óıtkeni men buryn atqa minip kórgen emespin. Kaskaderler maǵan kómektesti, úıretti», - deıdi 14 jastaǵy Mádı Menaıdarov.
Aıta keteıik, «Barymtashylar. Ýaqyt joly» fılmi alǵash ret 2019 jyly Azıadaǵy eń iri kınofestıvalderdiń biri – halyqaralyq Býsan kınofestıvali sheńberinde kórsetildi.
Al byltyr atalǵan týyndy Tokıodaǵy halyqaralyq kınofestıval sheńberinde kórsetilip, Japonıada prokatqa shyqty. Sondaı-aq kartına Göteborg International Film Festival atty Skandınavıadaǵy eń iri festıválde kórsetildi.
Odan bólek fılm Gonkong, Praga, Barselona, Nú-Delı, Helsınkı, Toronto, Kottbýs, Jeneva syndy qalalarda ótken festıválderge qatysty.
2021 jyldyń 29 maýsymynda «Ýaqyt joldary» fılmi Fransıada prokatqa shyǵyp, 20-dan astam qalada kórsetildi.
Qazan aıynda Qazaqstan men Japonıa birlesip túsirgen fılm sandyq TV+ telearnasy arqyly kórsetiletin bolady.