Bári – búldirshinderdiń baqytty bolashaǵy úshin
Almaty Memlekettik qýyrshaq teatry otbasylyq qundylyqtardy nyǵaıtý, balalarǵa qýanyshqa toly sátter syılaý maqsatynda qyzyqty spektáklder kórsetilimi men turaqty mádenı-tanymdyq is-sharalar uıymdastyryp keledi.
Ulttyq qýyrshaq ónerin jańǵyrta túsý arqyly búldirshinderdiń dástúrli ónerge, mádenı tarıhymyzdy bilýge degen qyzyǵýshylyǵyn týdyrý baǵytynda jańa spektáklder daıyndalý ústinde. Qýyrshaq teatry memlekettik merekeler qarsańynda kórermender nazaryna tegin master-klastar, merekelik efırler, oıyn-saýyqtyq aıdarlar men tanymdyq beınejazbalar usynýdy qolǵa alǵan.
Sonymen qatar, jyl saıyn Balalardy qorǵaý kúni merekesi aıasynda merekelik baǵdarlama men áleýmettik jaǵdaıy tómen, múmkindigi shekteýli balalarǵa qaıyrymdylyq aksıasyn uıymdastyrý dástúrge aınalǵan. Teatr ujymy tek balalarǵa arnalǵan spektáklder emes, eresekterge arnalǵan qoıylymdar sahnalaýymen de qazaq qýyrshaq ónerin álemdik keńistikte keńinen nasıhattap keledi.
Teatr ár jyldary kóptegen festıválderge qatysyp, júldeli oryndarǵa ıe bolyp, qazaq qýyrshaq óneriniń damýyna úzdiksiz úles qosýda. Bıyl da birneshe respýblıkalyq jáne halyqaralyq teatr festıválderine shaqyrtý aldy.
Atap aıtqanda, Túrkıanyń Koná qalasynda ótetin «Myń tynys, bir daýys» XIII Halyqaralyq teatr festıvali, Moldova Respýblıkasy Kıshınev qalasyndaǵy «Pod shapkoı Gýgýse» qýyrshaq teatrlarynyń festıvali, Reseı Federasıasy, Novosıbırsk qalasynda ótetin «Perekrestok» qýyrshaq teatrlarynyń festıvaline jáne Aqtóbe qalasynda ótetin V «BALAUSA» eksperımentaldi spektáklder festıvaline teatr ujymy shaqyrtý aldy.
Túrli teatr festıválderinen bólek, repertýarǵa qosylatyn árbir jańa spektákl de kórermenderimizdiń qataryn arttyryp, qýyrshaq ónerin keńinen nasıhattaýǵa baǵyttalýda. 20 jyldan asa kórermenderdiń súıikti qoıylymyna aınalyp, úzdiksiz sahnalanyp júrgen «turaqty qoıylymdar kórsetilimi» osy sózimizge dálel. Odan bólek, teatrdyń tólqujatyna aınalǵan «Qýyrshaq-dýman», «Toba» qoıylymdary balalardyń óz otbasy men Otanyn súıýine yqpal etedi. Otbasy ınstıtýtyn nyǵaıtýǵa jáne otbasy qundylyqtaryn jas urpaqtyń boıyna sińirýge baǵyttalǵan qoıylymdar kórsetilimi kórermender nazaryna úzdiksiz usynylyp keledi.
Ótken ǵasyrda irgetasy qalanǵan Almaty Memlekettik qýyrshaq teatry búginge deıin qýyrshaq óneriniń júıesin meńgerip, tarıhı kezeńderdi basynan ótkerdi. Sol qundylyqtardy kózimizdiń qarashyǵyndaı saqtap, urpaq ıgiligi úshin bilikti jumys isteý – paryzymyz. Kórermenderdiń suranysyn qanaǵattandyra otyryp, áleýmettik paraqshalar arqyly da teatrǵa kórermenderdi qyzyqtyrý jumystaryn júrgizip kelemiz. Jelidegi jarnamalar arqyly balalardy sheksiz aqparat áleminen paıdaly dúnıelerge qyzyqtyrý – maqsatymyz. Sonymen qatar, bilim mekemelerimen, balabaqshalarmen jumys istep kelemiz. Erteń el týyn jelbireter búldirshinderdiń baqytty bolashaǵy úshin eńbektený – barshamyzǵa ortaq mindet. El erteńine qamqor bolaıyq!
Almat ABDRAHMANOV,
Memlekettik qýyrshaq teatry dırektorynyń mindetin atqarýshy.