Memleket basshysynyń qyrkúıek aıyndaǵy Joldaýynda «Elimizdiń basty qundylyǵy – adam. Bul – aıqyn nárse. Sondyqtan ulttyq baılyqty teń bólý jáne barshaǵa birdeı múmkindik berý – reformanyń basty maqsaty» degen bolatyn. Iaǵnı Prezıdentimiz halyq áleýetin kóterýge basa nazar aýdaryp otyr. Osy oraıda, elimizdegi kedeıshilik deńgeıi 20 jylda 9 ese tómendegenin aıta ketken jón.
QR Eńbek jáne halyqty áleýmettik qorǵaý mınıstrliginiń dereginshe, halyqty áleýmettik qoldaý jónindegi belsendi sharalardyń arqasynda 2001–2021 jyldar kezeńinde Qazaqstanda kedeılik deńgeıi, ıaǵnı tabysy eń tómengi kúnkóris deńgeıinen tómen halyqtyń úlesi 46,7%-dan 5,2%-ǵa deıin tómendegen.
Áleýmettik saıasattyń negizgi mindeti jáne onyń tıimdiliginiń basty ólshemi – Qazaqstan halqynyń ál-aýqatyn udaıy arttyrý. Eldegi kedeılik deńgeıiniń serpindi tómendeý úrdisi 2000–2005 jyldar kezeńinde qoldanysta bolǵan respýblıkalyq baǵdarlamalardy iske asyrýdyń nátıjesi boldy. Bul úderiste 2002 jyly kúshine engen «Memlekettik ataýly áleýmettik kómek týraly» Zańnyń qabyldanýy erekshe ról atqardy. Bul qujatta qandaı da bir obektıvti sebepterge (jasyna, ýaqytsha eńbekke jaramsyzdyǵyna, densaýlyq jaǵdaıyna, jumystyń bolmaýyna jáne t.b.) baılanysty óz tynys-tirshiligi úshin jaǵdaılardy qamtamasyz etýde qıyndyq kórip otyrǵan tabysy az azamattarǵa ataýly áleýmettik kómek (budan ári – AÁK) kórsetý kózdeldi.
Eldiń ındýstrıalyq damýdyń jańa kezeńine ótýi jaǵdaıynda qoldanystaǵy eń tómengi áleýmettik standarttardy qaıta qaraý, AÁK kúsheıtý, enjar kómekten ómirlik qıyn jaǵdaıdy eńserý úshin otbasylardyń eńbek belsendiligi men kúsh-jigerin yntalandyratyn belsendi saıasatqa kóshý qajettiligi qalyptasty. Osyǵan baılanysty 2020 jyldan bastap ataýly áleýmettik kómek kórsetýdiń qoldanystaǵy júıesi túzetildi. Negizgi baǵdar eńbekke yntalandyrý, tabysy az azamattardyń tabystary men memlekettik qoldaý mólsherlerin esepke alýǵa qatysty ashyqtyq pen ádildikti qamtamasyz etý boldy.
Mınıstrlik málimetinshe, búgingi kúni belgilengen áleýmettik kómek qoǵamnyń osal toptaryna ýaqytyly berilýde. 2022 jyldyń 1 qazanyna áleýmettik toptama alýshylar sany 343 myń balany qurady, onyń ishinde azyq-túlik paketin 1 jastan 6 jasqa deıingi 178,4 myń bala, «Jappaı oqytý» qory sheńberinde 7 jastan 18 jasqa deıingi 164,6 myń bala kómek aldy. Jalpy respýblıka boıynsha 2022 jylǵy 1 qazandaǵy jaǵdaı boıynsha 43 mlrd teńge tólendi.
Degenmen, Memleket basshysy ótken Joldaýynda áleýmettik qamsyzdandyrý júıesine ózgeris engizý kerektigin de aıtty: «Biz 2023 jylǵy 1 qańtardan bastap bala kútimi úshin tólemaqy tóleý merzimin sábı bir jarym jasqa tolǵanǵa deıin uzartamyz. Balalardyń eń mańyzdy shaǵynda – sábı kezinde ata-analary janynda kóbirek bolady».
Prezıdentimiz belgilegen baǵytty nazarǵa ala otyryp, bılik tarapy eńbekke yntalandyrýǵa jáne tabysy tómen otbasylardyń ómirlik qıyn jaǵdaıdy eńserýine tıisti deńgeıde kómek kórsetedi, áleýmettik tólemderdiń ashyqtyǵyn jáne ádildigin qamtamasyz etýge múmkindik beredi dep senemiz.