Oqý-aǵartý birinshi vıse-mınıstri Natalá Jumadildaeva Qazaqstanda barlyq muǵalim nege attestasıadan ótetinin túsindirdi, dep habarlady almaty-akshamy.kz.
Ortalyq komýnıkasıalar qyzmetinde ótken baspasóz máslıhatynda mınıstrdiń orynbasaryna «Muǵalimder tapsyratyn attestasıanyń myń qubylyp, ózgerip jatqany týraly aıtylyp jatyr. Pedagog-zertteýshiler óz sanatynda qalsa, test tapsyrmaıtyny aıtylǵan. Keıin onyń bárin alyp tastap, olar qaıtadan test tapsyratyn boldy. Attestasıada nege naqtylyq joq? Ol qashan bir júıege qoıylady?» degen suraq qoıyldy.
Natalá Jumadildaeva barlyq másele jumys tobynda qaralǵanyn atap ótti.
Pedagogterdi atestattaýdyń jańa erejesin ázirleý boıynsha jumys toby qurylǵan. Onyń quramyna 60-tan asa adam bar: pedagogtar, bilim berý salasyndaǵy úkimettik emes uıymdardyń ókilderi. Jumys tobynda 44 ret kezdesý ótkizildi. Onda ártúrli másele qarastyrylyp, ártúrli zertteýler mysalǵa keltirildi. Osyǵan baılanysty kóptegen norma qabyldandy. Mundaı sheshim bizdiń pedagogıkalyq qaýymdastyqpen birge qabyldandy.
Endi muǵalimderdiń tilegine toqtalaıyn. Munda olardyń tilegi, jańa erejege qatysty kózqarasy úkimettik emes uıymdardyń ókilderimen sáıkes kelmedi. Jumys tobynda olar (úkimettik emes uıymdar ókilderi) argýmentter keltirip, test tapsyryp, taǵy bir tolyq attestasıadan ótkizýdiń qajeti bar ekenin dáleldedi, - dedi vıse-mınıstr.
Oqý-aǵartý mınıstrligi prezıdenttiń tapsyrmasy boıynsha pedagogtiń úzdiksiz kásibı damýy boıynsha jańa tásil ázirlegen. Osyǵan baılanysty barlyq muǵalim attestasıadan ótedi.
2025 jylǵy 1 qańtardan bastap pedagogtarymyzdyń eńbek tıimdiligi «Ustaz» elektrondy platformasynda baǵalanady. Platforma tolyq sıfrlandyrylyp, pedagog qyzmetiniń tıimdiligine monıtorıń júrgizýge múmkindik beredi. Munda pedagogtyń praktıkalyq qyzmetine basymdyq beriledi. Bul – muǵalimniń sabaǵyn taldaý, oqytý ádisterin tıimdi qoldana bilý, synyptardaǵy oqytý sapasy.
Platformaǵa ótý úshin muǵalimniń pándi qanshalyqty deńgeıde biletini baǵalanady, pedagogıka men ádisteme máselesi praktıkaǵa jatqyzylady. Sondyqtan jumys tobynda pedagogtar 2025 jylǵy qańtarǵa deıin ótpeli kezeńnen ótip, pándik bilimi jáne oqytý ádistemesi, psıhologıa boıynsha test tapsyryp, attestasıadan ótedi», - dedi Natalá Jumadildaeva.