Kórkem gımnastıkadan qazaq sportshylary arasynda Olımpıada oıyndaryna alǵash qatysqan Álıa Iýsýpova mereıli 40 jasqa toldy, dep habarlaıdy almaty-akshamy.kz.
Uzaq jyldar boıy úlken arenalarda el namysyn qorǵaǵan ol úlken sportta nesimen este qaldy?
Álıa Iýsýpovanyń esimi qazaq gımnastıkasyn jańa deńgeıge kótergen sportshy retinde atalady. Ol kásibı mansabynda kóptegen jetistiktikterge ıe bolyp, eki Olımpıadaǵa qatysty.
Sportshy 1984 jyly 15 mamyrda Shymkent qalasynda dúnıege kelgen. Kórkem gımnastıkadan jeke jattyǵý boıynsha 2000-2009 jyldary aralyǵynda elimizdiń absalútti chempıony atanyp, úzdik ekenin dáleldeı aldy.
2004 jyly Afıny Olımpıadasynda tórtinshi orynǵa turaqtap, Azıa chempıonatynda 12 márte jeńimpaz atanǵan. Sondaı-aq, Azıa oıyndarynyń eki dúrkin chempıony jáne kúmis júldegeri. Budan bólek, Ýnıversıada oıyndarynda 4 qola júldeni enshiledi.
Álıa Iýsýpova kásibı sportty aıaqtaǵan soń Shymkent qalasynda kórkem gımnastıka mektebin ashyp, bapkerlikpen aınalysty. Keıin Ulttyq quramaǵa jetekshilik etip, shákirtteri halyqaralyq jarystarda jaqsy nátıjege qol jetkizdi. Al 2021 jyldyń basynan beri ol federasıa prezıdenti retinde qyzmetini jalǵastyryp keledi.
Álıa Iýsýpova buǵan deıin bergen suhbattarynda jattyǵý kezinde alǵan jaraqatyna baılanysty sporttan ketýdi oılaǵanyn aıtqan bolatyn.
«Afıny Olımpıadasyna barý úshin men óte aýyr joldan óttim. 2002 jyly Pýsandaǵy Azıa oıyndaryna qatysyp, komandalyq synda ekinshi oryn ıelendik. Al men jekeleı jarysta kúmis júldeger atandym. Sol básekeden keıin sol aıaǵymdy qatty jaraqattap alǵanmyn. Ota jasaýǵa týra keldi. Qatty aýyrǵany sonsha, sol aıaǵymdy súıretip júretinmin. Muny kórgen ákem sportpen qoshtasýymdy surady. Óıtkeni, meniń júre almaı qalǵanymdy kórý olarǵa aýyr edi. Biraq men bárine shydadym. 2003 jyly úsh aı jattyǵý jasaýǵa ruqsat bergen joq. Osy sátte maǵan senbeı, ornyma basqa sportshyny jibergisi kelgender de boldy. Alaıda, jeke bapkerim Ekaterına Panchenko men Irına Vıner meniń bárin jeńetinime sendi. Jaılap jaraqattan aıyǵyp, jarystarǵa qatysyp, Afıny Olımpıadasyna joldama aldym. Al tórtinshi oryn men úshin jeńiske para par», - degen edi ol suhbatynda.
Otandasymyz jasyna qaramastan kórkem gımnastıkada uzaq júrdi. Ádette bul sporttaǵylar 20 jasynda kásibı mansabyn aıaqtap jatady. Bul rette ol 26 jasyna deıin óner kórsetti.
Al bapkerlik qyzmetke kelerde Álıa ákesimen keńesip, bir sheshimge kelgen.
«Sporttan ketken soń, jattyqtyrýshylyq qyzmetti qolǵa aldym. Bul isti bastar aldynda ákem aqylyn aıtty. Jaqsy sportshydan jaqsy bapker shyqpaýy múmkin ekenin eskertti. Men oılana kele, munyń bárin is júzinde baıqaıyq dep sheshtim», - dedi otandyq BAQ-qa bergen suhbatynda.