Eki jyl buryn Prezıdenttiń tapsyrmasymen «Jaıly mektep» ulttyq jobasy bastaldy.
Býrabaıda ótip jatqan Ulttyq quryltaı barysynda Prezıdent Qasym-Jomart Toqaev atalǵan jobaǵa qatysty birqatar tapsyrma berdi, dep habarlaıdy aqshamnews.kz.
Aqmola oblysy ulttyq joba boıynsha salynatyn barlyq mekteptiń qurylysyn birinshi bolyp aıaqtady. Aımaqta 12 myńnan astam oqýshyǵa arnalǵan jańa bilim oshaqtary ashyldy.
«Basqa oblystarda qurylys barysy máz emes. Úkimet pen «Samuryq-Qazyna» qory bul jumysty qolǵa alýy kerek. Men taıaý arada tekseremin», -dedi Memleket basshysy.
Bıyl elimizde 500 myń oqýshyǵa arnalǵan eki júzden astam mektep salynady. «Jaıly mektep» jobasyna qatysty Prezıdent qaperde ustaý qajet bir jaıtty aıtty.
«Barlyq jerde tek «Jaıly mektep» jobasy aıasynda mektep salý mindetti emes. Sapaly salynǵan qarapaıym mektepterge de suranys joǵary. Úsh jylda 1300, sonyń ishinde aýyldaǵy 900 bilim ordasyn jańǵyrtý qajet. Jańa oqý jylyna deıin memlekettik jáne jekemenshik mekteptiń barlyǵy balalardyń qaýipsizdigin qamtamasyz etetin arnaıy quraldarmen jabdyqtalýǵa tıis», - dedi Prezıdent.