Erbolat Dosaev – turǵyndardyń kásipkerlerdi jazalaýdy talap etýi týraly
Almaty ákimi Erbolat Dosaev Bostandyq aýdanynyń turǵyndarymen kezdesýde turǵyndardyń keıbir kásipkerge qatysty shaǵymyna jaýap berdi.
«Men Toraıǵyrov kóshesinen 500 metr qashyqtyqta turamyn, bólmemniń terezesin asha almaımyn, sebebi káýaphananyń ıisi shyǵady. Ótinemin, qandaı da bir shara qoldanyńyzshy», - dedi aýdan turǵynynyń biri ákimnen.
Qala basshysy osyndaı shaǵymnyń basqa aýdandardan da túskenin, qazir qala boıynsha tekseris júrgizilip jatqanyn aıtty.
«Árbir tekseristen buryn Quqyqtyq statısıka komıtetinde tirkeledi, ol jerde kásipkerlerge artyq qysym jasap jatqan joqpyz ba, sol muqıat qaralady. Ótken joly osy máseleni Ulttyq ekonomıka mınıstrligi men Saýda jáne ıntegrasıa mınıstrligine usynǵanymdy aıtqan bolatynmyn. Usynys qabyldanǵannan keıin máseleni júıeli túrde sheshemiz dep úmittenemin. Qajetti jumystardy júrgizemiz», – dedi Erbolat Dosaev.
Sondaı-aq, qala basshysy kásipkerlik basqarmasyna, aýdan ákimdigine, sanıtarlyq-epıdemıologıalyq baqylaý departamentine osy máseleni baqylaýǵa alýdy tapsyrdy.
«Zań talaptaryna sáıkes keletin jaqsy súzgilerdi ornatý úshin kásipkermen sóılesińizder, eger ornatpasa, tıisti sharalar qabyldańyzdar», – dep ákim tapsyrma berdi.
Qala basshysy bıznestiń kásipkerlik Kodekspen qorǵalǵanyn jáne máseleni sheshý úshin normatıvtik-quqyqtyq aktilerge ózgerister engizý qajet ekenin aıtty. Tıisti usynystar ortalyq memlekettik organdarǵa berildi.
«Qala prokýratýrasyn obektıvti tekseris júrgizýge shaqyramyn, belgilengen normalar men erejelerdiń saqtalmaǵanyn jáne negizgi talaptardyń oryndalmaı jatqanyn kórip, sonyń negizinde sheshim qabyldaýǵa bolady, barlyǵy zańdy túrde bolýy kerek», – dedi Erbolat Dosaev.