Qoımadaǵy jalyndy óshirýge tórt saǵattaı ýaqyt ketken.
Almatydaǵy bazardyń birindegi qoımadan shyqqan órt sóndirildi, dep habarlaıdy Almaty-akshamy.kz Almaty qalalyq tótenshe jaǵdaılar departamentine silteme jasap.
Oqıǵa ornynda jeke quramnyń 91 qyzmetkeri, 23 tehnıkasy men «Almaty Sý» mekemesiniń 2 sý tasyǵysh mashınasy jáne qalanyń ózara is-qımylynyń búkil kúsh-quraldary jumyldyryldy.
«Órt sóndirý jumystary ońaıǵa soqpady. Óıtkeni obektidegi órt gıdrantynan aqaý shyqty. Osyǵan baılanysty sý berý jumystary qosymsha qamtamasyz etildi: órt sóndirý avtosısternalarynan magıstraldyq jeliler tartyldy, jaqyn mańdaǵy sý qoımasynan sý alyndy. Almaty sý tehnıkasy iske qosyldy. Qurylymdar qulap, órt sóndirýshiler qoımaǵa kire almaı áýrege tústi», - dep habarlady qalalyq TJD baspasóz qyzmeti.
Shuǵyl qabyldanǵan sharalardyń arqasynda órt túski saǵat 13:18-de tolyq sóndirildi.
Eske salsaq, Almatydaǵy qoımalardyń biri búgin tańerteńnen beri órtenip jatqanyn habarlaǵan bolatynbyz.