Aýylsharýashylyq ónimin óńdeıtin kásiporyndarǵa sýbsıdıa berý tártibi ózgermek.
Aýylsharýashylyq ónimin tereńdete óńdeıtin kásiporyndardyń shyǵyndaryn sýbsıdıalaý tártibi ózgerýi múmkin. Bul týraly Aýyl sharýashylyǵy mınıstrligi ashyq talqyǵa shyǵarǵan buıryǵynda kórsetilgen, dep habarlaıdy Almaty-akshamy.kz QazAqparatqa silteme jasap.
«Ótinim boıynsha sýbsıdıalar somasyn tolyq tóleý úshin qajetti búdjet qarajaty jetkiliksiz bolǵan jaǵdaıda sýbsıdıalar somasyn bólikterge bólýge jol beriledi. Bul rette sýbsıdıalar somasynyń tólenbegen qaldyǵy kelesi aıda ne aǵymdaǵy nemese qarjy jylynda qosymsha búdjet qarajaty bólingen kezde tólenedi», - delingen jańa redaksıada.
Toqtala ketsek, qoldanystaǵy tártipte kásipkerler bergen ótinish boıynsha sýbsıdıa somasyn jergilikti búdjetten óteý múmkin bolmasa, onda maslıhat sheshimimen óńirlik búdjetten qosymsha qarajat bólinetin. Al engizilgeli otyrǵan ózgeriske sáıkes, qarajat jetispese, jaýapty organ sýbsıdıany fermerlerge bólip tólemek.
Qujatty ashyq talqylaý 27 qańtarǵa deıin jalǵasady.