Búginde Qazaqstan Jazýshylar Odaǵynyń quramynda 820 múshe bar, olardyń 400-i Almatyda turady.
Almaty ákimi Baqytjan Saǵyntaev Qazaqstan Jazýshylar odaǵynyń múshelerimen shyǵarmashylyq birlestikti qoldaý jáne damytý máselelerin talqylady, sondaı-aq mereıtoılyq dataǵa oraılastyrylǵan «Almaty-Táýelsizdiktiń altyn besigi» baıqaýynyń qorytyndysy shyǵaryldy, dep habarlaıdy Almaty-akshamy.kz
Kezdesýde Baqytjan Saǵyntaev koronavırýs boıynsha kúrdeli sanıtarlyq-epıdemıologıalyq ahýaldy qala turǵyndarynyń esine saldy. Dert deńgeıiniń tómendeýine qaramastan, álemde jańa "omıkron" shtamy taralýda. Onyń Qazaqstanǵa enýi ábden múmkin. Sondyqtan qala ákimi barlyq almatylyqtardy óz densaýlyǵyn saqtaýǵa jáne dárigerlerdiń halyqty vaksınalaý, endi revaksınalaý jónindegi kúsh-jigerlerin qoldaýǵa shaqyrdy.
2019 jyldyń sońynda qalyptasqan dástúrge saı almatylyq aqyndar men jazýshylar Almaty ákiminiń grantyna ıe boldy.
Sondaı-aq, búgin mereıtoılyq dataǵa oraılastyrylǵan «Almaty – Táýelsizdiktiń altyn besigi» shyǵarmashylyq baıqaýynyń qorytyndysy shyǵaryldy. Metrlermen qatar baıqaýǵa jas aqyndar men jazýshylar qatysty. Shyǵarmashylyq jumystar tórt janrda usynyldy – poezıa, proza, balalar ádebıeti, dramatýrgıa.
Asqat Ómirbaev «Áke, elge qaıtaıyqshy!» áńgimesi, Turysbek Sáýketaev «Kókshýlan» novelasy, Dýman Ramazan «Úkim» tarıhı dramasy, Patıgúl Mahsatova qazaq tilindegi óleńder toptamasy úshin jeńimpaz bolyp tanyldy.
Baqytjan Saǵyntaevtyń tapsyrmasy boıynsha ótken jyly 30 avtordyń jumysyn basyp shyǵarý úshin qarjy bólindi. Jas jazýshylardyń da, qazaq ádebıeti klasıkteriniń de eńbegi qoldaý tapty. Aǵymdaǵy jyly júzden astam tanymal sóz sheberleri men jas avtorlardyń kitaptary jaryq kórdi. Kitaptardyń tusaýkeseri qala kitaphanalarynda ótedi.
«Jazýshylar qaýymdastyǵyn qoldaý jalǵasady. Sizder tarıhı oqıǵalardyń shynaıy kýási retinde olardy júrekten ótkizip, oqyrmanǵa jetkizesizder. Táýelsizdiktiń mereıli jylynda sizderge zor densaýlyq pen shabyt tileımin!» - dedi Baqytjan Saǵyntaev kezdesý sońynda.