Almaty qalasynyń ákimi Baqytjan Saǵyntaev «Almaty» telearnasyndaǵy «Akimat LIVE» baǵdarlamasynyń kezekti tikeleı efırinde megapolıstegi epıdemıologıalyq ahýaldyń kúrdelenýi jáne KVI dertiniń asqynýy týraly habarlady. Vırýstyń taralýyna qarsy turý úshin qalalyqtardy belsendi túrde ekpe alýǵa shaqyrdy.
Sonymen qatar shahar turǵyndarynyń saýaldaryna jaýap berdi.
Chempıondar áli de shyǵady
Tursynǵalı EDİLOV,
Qazaqstan Respýblıkasynyń eńbek sińirgen jattyqtyrýshysy:
– Qaıyrly kesh, Baqytjan Ábdiruly! Barshaǵa belgili, qazirgi tańda Tokıo tórinde dúbirli Olımpıada ótip jatyr. Jalpy, megapolıste bolashaq chempıondardy baýlý, sportty damytý turǵysynda qandaı jumystar atqarylýda?
Baqytjan SAǴYNTAEV:
– Jankúıer retinde men de Olımpıada oıyndaryn qadaǵalap otyramyn. Barlyq sportshyǵa tilekshimin. Almatyda bolashaq chempıondardy daıyndaý úshin sporttyq nysandardyń qoljetimdiligi men ashyqtyǵyna basa nazar aýdarylady ári keshendi is-sharalar qabyldanýda. Osy maqsatta 6 sporttyq-saýyqtyrý kesheniniń, sondaı-aq úlken tenıs pen ústel tenısi ortalyqtarynyń qurylysy júrgizilýde. Halyqaralyq «Suńqar» shańǵy tramplınder kesheninde sport kesheniniń qurylysy aıaqtalýda.
Tegin qadamdyq qoljetimdi ashyq alańdarda, jekpe-jek ortalyqtarynda 40-tan astam jattyqtyrýshy sabaq berýde. Osylaısha bir jarym myńnan astam bala men jasóspirimder sportpen shuǵyldanýda. Sonymen qatar, jan basyna shaqqanda qarjylandyrý arqasynda 3 myńnan astam bala sport seksıalaryna aqysyz baryp júr. Osyndaı júıeli jumystardyń nátıjesinde bizdiń qaladan da bolashaqta olımpıadalardy baǵyndyratyn chempıondar shyǵady dep senemin.
BAǴLAN,
shahar turǵyny:
– Men múmkindigi shekteýli balaǵa qaraýshy adam retinde qoǵamdyq kólikte jeńildikpen júrý quqyǵyn beretin «Ońaı» kartasyn ala almaı júrgenime birneshe aı boldy. Qalanyń mobıldilik basqarmasy men «Transportholdıng» ókilderinen áli kúnge jaýap ala almaı júrgen jaıym bar.
«Orbıta» shaǵynaýdanyndaǵy №4 qalalyq emhanada dárigerler jetispeıdi. Osy máselelerge nazar aýdarsańyz eken.
Baqytjan SAǴYNTAEV:
– Áriptesterimizge aty-jónińizdi, mekenjaıyńyzdy tolyq qaldyryńyz, máseleńizdi sheshemiz. Siz aıtyp otyrǵan №4 emhana qaladaǵy eń úlken medısınalyq mekemelerdiń biri, eki-aq dáriger bar degen múmkin emes jaǵdaı ǵoı. Erteń mán-jaıdy tekserip, ózderińizge jaýaby aıtylatyn bolady.
Arnaıy shtab qurylady
ERBOLAT,
Alataý aýdanynyń turǵyny:
– Baqytjan Ábdiruly, aldymen Sizdiń basshylyǵyńyzben qolǵa alynǵan «Jańa Almaty» baǵdarlamasy aıasyndaǵy atqarylyp jatqan sharýalar kóp. Búginde qalanyń tómengi bóligi jaqsy damyp, ózgerip keledi. Júrgizilip jatqan jumystar úshin alǵys bildiremin. Desek te, meni mazalaıtyn birqatar saýaldar bar: birinshisi – aýdanymyzda kógaldandyrý jumystaryna baılanysty aǵashtardy sýarý jumystary múlde júrgizilmeıdi. KSK-ǵa qansha aıtsaq ta, eshqandaı nátıje joq. Ekinshi másele – biz 14 qabatty úıde turamyz. Biraq úıdiń kireberisine dúkender ornalasqan. Sol sebepti biz tórt jyldan beri evakýasıalyq esikterden kirip-shyǵamyz. Bul qanshalyqty zańdy? Sodan keıin, ózińiz bilesiz, «Almaty Arenanyń» artynda úlken stadıon salynǵan. Sonyń artqy jaǵynda úlken gır laqtyratyn arena bar. Sol jer búginge deıin esh qoldanyssyz tur. Osy jerlerge balalarǵa arnalǵan sport alańdaryn ashsa qalaı bolar eken?
Baqytjan SAǴYNTAEV:
– Birinshi saýal – kireberister boıynsha másele nede ekenin tekserý kerek. Bul saýaldyń túıinin sheshý úshin sala basshysyna tapsyrma berdim. Al ekinshi másele boıynsha, ıá, bir barǵanymyzda ne istesek bolady dep oılanǵanymyz bar. Eger ol jerge balalarǵa arnap sport alańyn salatyn bolsaq, ony kásibı túrde sportpen aınalysatyn jaqsy ortalyq jasaý kerek. Qazir sport basqarmasy ákimdikpen birge ne ornalastyrý kerektigin oılastyryp jatyr.
Jalpy, kógaldandyrý jumystary boıynsha qalalyq ákimdik tarapynan arnaıy shtab qurý jumysy júrgizilip jatyr. Eger bile bilseńizder, qala boıynsha jasyl alań 12 myń gektardan asady. Onyń 800 gektary merdiger kompanıalardyń qaraýynda. Deıturǵanmen onyń barlyǵyn bir ǵana ákimshiliktiń kúshimen sýǵarý múmkin emes.
Sondyqtan qalany jap-jasyl etip ustap turý tehnıkalyq turǵydan da qıyn. Al halyq kóp júretin oryndardaǵy sýarý jumystary únemi ári mindetti túrde júrgizilýge tıis.
FARHAT,
Túrksib aýdanynyń turǵyny:
– Qaıyrly kesh, Baqytjan Ábdiruly! Siz basshylyqqa kelgen jyly Túrksib aýdanynyń turǵyndarymen kezdesý ótkizgende kóshemizde jańbyrly kúnderi sý jınalyp, ary-beri júrý múmkin bolmaı qalatyndyǵyn aıtqan bolatynbyz. Aýdan basshylyǵy bul máseleni áli sheshpeı otyr. Ekinshi saýalym – Kassın kóshesinde №49 mektep ornalasqan. Mektepte oqýshy kóp. Sol mańǵa «Sergek» beınebaqylaý kamerasyn ornatyp, oqýshylardyń ótýine yńǵaıly bolýy úshin trotýarlar ornatylsa degen ótinishimiz bar.
Baqytjan SAǴYNTAEV:
– Arnaıy jol júrý belgilerin qoıý sonshalyqty qıyn sharýa emes. Túrksib aýdanynyń ákimine tapsyrma berildi. Erteń ótinish ıesimen birge qajetti mekenjaıǵa trotýar qoıý máselesin sheship beredi.
«Búdjetke qatysý» – halyq múddesi
Dımash DAÝYLBAEV,
qala turǵyny:
– Men «Zerdeli» yqshamaýdanynan habarlasyp otyrmyn. «Búdjetke qatysý» baǵdarlamasy boıynsha jobamyzdy usynyp edik. Biraq eshqandaı jumys júrgizilmeı otyr. Bul boıynsha jumys isteıtin kompanıamen baılanysqa shyǵyp edik. Olar buǵan múldem basqa búdjet qarastyrylǵanyn aıtyp otyr. Ókinishke qaraı, bul boıynsha bizge ákimdikten nemese kompanıa ókilderinen eshkim kelip túsindirgen joq.
Baqytjan SAǴYNTAEV:
– Qazir aýdan ákimin qosaıyq. Bul rette keıbireýlerdiń tek konkýrstyq jumystary ǵana ótti. Múmkin osyǵan baılanysty shyǵar...
Azamat QALDYBEKOV,
Alataý aýdanynyń ákimi:
– Iá, ótken aptada Amanat Cleaning kompanıasy bekitilgen bolatyn. Bul rette «Zerdeli» shaǵynaýdanynda «Búdjetke qatysý» boıynsha úsh joba qarastyrylǵan. Trotýarlar tóseý jobasyn ekspertter bekitti. Qazir daıyndyq jumystary júrgizilip jatyr. Qajetti tehnıka men jumys kúshi jumyldyrýda. Buıyrsa, osy aptada jumystar bastalady.
Baqytjan SAǴYNTAEV:
– «Búdjetke qatysý» baǵdarlamasy týraly aıtatyn bolsaq, «biz basqa búdjet usynyp edik, olar basqa búdjet qarastyryp otyr» degenniń bári, bul – konkýrstyq sharalar. Bul jerde kim az beredi, sol utady. Máselen, ol jumys on mıllıonǵa baǵalansa, degenmen, merdiger ony 5 mıllıonǵa jasaımyn dese, biz oǵan eshteńe isteı almaımyz. Tek sol bekitilgen qarajatty beremin. Men muny jurtshylyq túsinsin dep aıtyp otyrmyn.
TÚIİN.
«Akimat LIVE» baǵdarlamasynda kóterilgen máselelerdiń barlyǵy jaýapsyz qalmaıdy. Turǵyndar shaǵymy zań negizinde sheshiletin bolady. Qala ákimi Baqytjan Saǵyntaev qazirgi epıdahýalǵa baılanysty turǵyndardy saqtyq sharalaryn barynsha saqtaýǵa shaqyrdy.
Ázirlegen Nurjamal ÁLİSHEVA,
Quralaı IMANBEKQYZY,
Serik JUMABAI.