Qara halyqty paıdalanatyn deldaldarǵa tosqaýyl
2023 jylǵy 3 naýryzdan bastap bankrottyq rásimin qoldanýǵa nıet bildirgen azamattardan ótinishter qabyldaý bastaldy. QR Qarjy mınıstrliginiń Memlekettik kirister komıtetiniń derekterine sáıkes, keıbir HQO-lardyń aldynda aqshalaı syılyqaqy úshin qajetti qujattar resimdep berýdi usynatyn «kómekshiler» paıda boldy. MKK ókilderi sottan tys bankrottyq rásimi (bereshek 5,5 mln teńgeden artyq bolmaǵan kezde) múldem tegin ekendigi jóninde eske saldy, dep habarlaıdy Almaty-akshamy.kz.
Qaryz alýshylardy aldaý úshin «kómekshiler» qandaı ańyzdar oılap tabatyndary jóninde Fingramota.kz taldap kórdi.
«Sizdiń sottan tys bankrottyq rásimi boıynsha qaryzdaryńyzdy deldalsyz esepten shyǵarmaıdy»
Qaskúnemder sottan tys bankrottyq rásimine ótinish jazý jáne memlekettik organdarǵa usyný boıynsha óz qyzmetterin usynady. Olar azamattardy ózdiginen jazylǵan ótinishter eshbir jaǵdaıda qaralmaıdy dep sendiredi.
Bul jalǵan túsinik! «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyǵy týraly» Zańǵa sáıkes qazaqstandyqtar sottan tys bankrottyq rásimine ótinishti derbes jáne múldem tegin usynady. Eń bastysy, mynadaı talaptar saqtalýǵa tıis:
1. Bankter, mıkroqarjy uıymdary jáne kolektorlyq agenttikter aldyndaǵy bereshek 1600 aılyq eseptik kórsetkishten aspaýǵa tıis (2023 jylǵa – bul 5 mln 520 myń teńge);
2. Boryshkerdiń atyna tirkelgen múliktiń, onyń ishinde ortaq menshiktegi múliktiń bolmaýy.
3. Ótinish berilgen kúni qatarynan 12 aı ishinde kredıtorlar men kolektorlar aldyndaǵy mindettemelerdi óteýdiń bolmaýy.
4. Merzimi ótken bereshek týyndaǵan sátten bastap 18 aıdan aspaıtyn merzimde kredıttik shart boıynsha oryndalmaǵan mindettemelerdi retteý nemese óndirip alý jónindegi rásimnen mindetti túrde ótý.
Eger boryshker ótinish bergen kúnge óziniń bereshegin 5 jyldan artyq ótemese, onda atalǵan barlyq talaptar oǵan qoldanylmaıdy.