«Halyq batyry» kórmesi ashyldy
3 sáýir – halyq batyry Amangeldi Imanovtyń týǵan kúni. Osyǵan oraı Qazaqstan Respýblıkasynyń Ulttyq mýzeıinde batyrdyń týǵanyna 150 jyl tolýyna oraı «Batyrdyń bıik tulǵasy: tarıhy, zerttelýi, aqıqaty» atty respýblıkalyq ǵylymı-tájirıbelik konferensıa ótti, dep habarlaıdy Almaty-akshamy.kz.
Mereıtoıǵa arnalǵan konferensıanyń plenarlyq otyrysynda memleket jáne qoǵam qaıratkerleri, belgili ǵalymdar sóz alyp, ult-azattyq kóterilistiń kóshbasshylaryna, sonyń ishinde A.Imanovtyń tarıhı tulǵasyna qatysty paıymdaryn ortaǵa saldy.
«1916 jylǵy ult-azattyq qozǵalysqa qatysýshylardy eske alý - eldiń tarıhı damýynyń kez kelgen kezeńindegi mańyzdy úrdis. El tarıhyn áıgili tulǵalar arqyly zerdeleý halyq taǵdyryndaǵy asa mańyzdy ózgeris bolyp tanylatyn: aýmaqtar úshin kúres, syrtqy jaýǵa qarsy turý, memlekettiń bostandyǵy men táýelsizdigin qorǵaý, mańyzdy saıası jáne mádenı jetistiktermen baılanysty. Osyndaı tulǵalar qatarynda 1916 jylǵy ult-azattyq kóterilistiń basshylarynyń biri, patsha áskerine qarsy kúrestiń belsendi qatysýshysy Amangeldi Imanov bar. Biz búgingi ǵylymı jıynda Amangeldi batyrdyń ult tarıhyndaǵy taǵylymdy orny, onyń kúreskerligi halqymyzdyń birligin saqtaýǵa arnalǵany jóninde ǵıbratty oı-tolǵaýlar men túıindi tujyrymdar aıtylady degen oıdamyn», - dedi QR Ǵylym jáne joǵary bilim vıse-mınıstri Talǵat Eshenqulov.
Konferensıa aıasynda Qostanaı oblysy mýzeıleriniń qorynan «Halyq batyry» atty kórme saltanatty túrde ashyldy. Kórmede tyl jumystaryna shaqyrý týraly patsha jarlyǵynyń jarıalanýyna baılanysty arhıv qujattarynyń kóshirmeleri men fotosýretter, Amangeldi Imanovtyń dombyrasy, A.Imanovtyń týystarynyń jeke zattary, sarbazdardyń qarý-jaraqtary jáne Qazaqstannyń halyq sýretshileriniń týyndylary qoıyldy. Kórme Qazaqstan Respýblıkasynyń Ulttyq mýzeıinde 2023 jylǵy 3 sáýirden 3 mamyrǵa deıin jumys isteıdi.
Búgin keshkisin E.Rahmadıev atyndaǵy Astana memlekettik fılarmonıasynyń shyǵarmashylyq ujymdary «Dala daýylpazy» atty konserttik baǵdarlama usynyp otyr.
Jalpy, Qostanaı oblysynda A.Imanovtyń mereıtoıyna qatysty arnaıy is-sharalar jospary qabyldanǵan. Qorytyndy mereıtoılyq sharalar aldaǵy qyrkúıek aıynda Amangeldi aýdanynda ótedi dep josparlanyp otyr.