Almaty polıseıleri bankterdiń biriniń qyzmetkerlerin aldaǵan alaıaqtardy ustady, – dep habarlaıdy almaty-akshamy.kz.
Almaty polısıasy birneshe aıyptalýshydan turatyn jáne shetelde tamyr jaıǵan zańsyz áreketter tizbegin anyqtady. Bul tizbektiń máni adamdardy aldaý arqyly múmkindiginshe kóp aqsha tabý boldy. Aldanǵandardyń arasynda ekinshi deńgeıli bankterdiń biriniń qyzmetkeri de bar.
– Onyń messendjerine quqyq qorǵaý organdarynyń ókilderi bank pen onyń qyzmetkerlerine qatysty tekserý júrgizip jatqanyn jáne ol olardyń naqty nusqaýlaryn oryndaýy kerek degen habarlamalar kele bastaǵan. Keıinirek olar kıbershabýyl bolǵanyn jáne alaıaqtyq áreketterdiń aldyn alý úshin barlyq qoldanystaǵy shottan aqshany alyp, sodan keıin senimdi adamdarǵa aýdarý qajettigin habarlaǵan. Osy nusqaýlardy oryndaǵan áıel shotynan 4 mıllıon teńge men 10 myń dollardy sheship alǵan. Ol aqshany kýrerge berip jibergen, – dedi Almaty qalalyq polısıa departamenti bastyǵynyń orynbasary Qýatbek Naýatov.
Alaıaqtardyń qurbanyna aınalǵanyn túsingen áıel polısıadan kómek surady. Kýrer dereý ustaldy. 19 jastaǵy jasóspirim bul árekettiń qylmystyq sıpatyn biletinin moıyndady: jumys berýshiler oǵan jábirlenýshilerden alǵan somanyń 1 paıyzy kóleminde syıaqy berip otyrǵan.
– Kýrer aqshany aýdarǵan shottardy anyqtadyq. Olardyń izi shetelde tabyldy. Aıtpaqshy, qylmystyq jolmen alynǵan qarajatty aýdarýǵa qatysqan úsh adam ustaldy. Qazir olardyń árqaısysynyń kinásiniń dárejesi anyqtalýda. Kúdiktiler qamaýǵa alyndy, – dedi Naýatov.
QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77-baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.
Aqparat kózi Polisia.kz saıtynda: https://polisia.kz/almaty-politsejleri-bankterding-birining-qyzmetkerlerin-aldaghan-alayaqtardy-ustady/