Bank qoımasyndaǵy qarajatty tekserý kezinde 602 900 000 teńge jetispeıtini anyqtalǵan.
Qyzylorda oblysynda bank qyzmetkeri 600 mln teńgeden astam qarjyny urlap ketken. Urlyq faktisi boıynsha QMA óńirlik departamenti tergeý júrgizýde, – dep habarlady Almaty-akshamy.kz. QR Qarjy monıtorıńi agenttiginiń baspasóz qyzmeti.
Kontroller-kassır shamamen 1 000 000 teńgeden 4 000 000 teńgege deıin aqshany bólshektep, kasadan urlaǵany anyqtaldy.
Banktiń 2021-2023 jyldar aralyǵyndaǵy beınebaqylaý kameralarynyń jazbalary tárkilendi, onda kasadan halattyń jeńine oralǵan aqshalardy shyǵarý arqyly urlaý faktileri tirkelgen.
Kúdikti jasaǵan qylmystyq quqyqbuzýshylyqty tolyq moıyndady.
Sotqa deıingi tergep-tekserý barysynda býkmekerlik keńseden onyń atyna tirkelgen shotynan aqparat alynyp, sońǵy 3,5 jylda esepshotqa 158 mln teńge túskeni anyqtaldy.
Sonymen qatar onyń atyna jáne jubaıynyń atyna tirkelgen abonenttik nómirlerden býkmekerlik keńselerdiń esepshotyna aqsha aýdarý boıynsha operasıalar júrgizilgeni týraly aqparat kelip tústi.
Kúdikti qamaýǵa alynyp, ýaqytsha ustaý ızolátoryna qamaldy.
Sotqa deıingi tergeý jalǵasýda. QR QPK-niń 201-babyna sáıkes ózge málimetter jarıa etilýge jatpaıdy.
QR Konstıtýsıasynyń 77-baby 3-tarmaǵy 1-tarmaqshasyna jáne QR Qylmystyq-prosestik kodeksiniń 19-baby 1-bóligine sáıkes, qylmystyq quqyqbuzýshylyq jasaýdaǵy kinási sottyń zańdy kúshine engen úkimimen belgilengenge deıin árkim kinásiz dep esepteledi.