Tazalyq saqtamaý: almatylyq kásipkerlerge tıisti tazalaý jumystaryn júrgizbegeni úshin aıyppul salyndy
Almaty qalasy ákiminiń orynbasary Beıbit Shahanov qys maýsymyna daıyndyq aıasynda komýnaldyq qyzmetterdiń kósheler men aýlalardy tazalaý jumystaryn tekserdi, dep habarlaıdy aqshamnews.kz
Aralaý barysynda magıstraldyq kóshelerde, aýlalarda, sondaı-aq komersıalyq nysandardyń aýmaqtarynda júrgizilgen tazalyq jumystary tekserildi.
Sonyń nátıjesinde ǵımarattarynyń aınalasyn tıisti deńgeıde tazalamaǵany úshin jeti komersıalyq uıym: eki Degirmen dámhanasy, Starbucks, «Sultan», Bay jáne Nanduk dámhanalary, sondaı-aq Kimex dúkeni 140 AEK kóleminde aıyppul tóleıtin boldy. Jalpy 516 880 teńge aıyppul salyndy.
Sonymen qatar, Medeý aýdanyndaǵy tazartylmaǵan aýla úshin merdiger uıymǵa qatysty 20 AEK aıyppul salý jóninde ákimshilik hattama toltyryldy.
Aıta ketý kerek, Tazalyq aptalyǵy aıasynda «Almaty Tazalyq» komýnaldyq kásipornynyń qyzmetkerleri kúsheıtilgen rejımde jumys istep, qalany qys mezgiline daıyndaýda. Atap aıtqanda, túsken japyraqtar men qoqystardy jınap, aryq júıelerin tazalaý jáne aýlalardy kóriktendirý jumystary qolǵa alyndy.
Sanıtarlyq tazalyq jumystary jalpy aýdany 25,1 mln sharshy metr bolatyn 2 318 kósheni, uzyndyǵy 2 777 km aýmaqty qamtıdy. Qysqy jumystardy tıimdi atqarý úshin 841 birlik tehnıka men 1 400 jumysshy jumyldyrylady. Sondaı-aq, «Almaty Tazalyq» avtoparkine 32 jańa zamanaýı tehnıka qosyldy.
Esterińizge sala keteıik, bıyldan bastap Almaty kásipkerlerine kóriktendirý tólqujaty beriledi. Qujatqa sáıkes, olar «Taza Qazaqstan» baǵdarlamasy aıasynda aýmaqtaryndaǵy tazalyqty qamtamasyz etýge mindetti. Kóriktendirý tólqujatynda abattandyrý men sanıtarlyq tazalyqty saqtaý, qoqys jáshikterimen qamtamasyz etý, shaǵyn sáýlet nysandarynyń durystyǵyn qadaǵalaý talaptary kórsetilgen. Talaptardy buzǵan jaǵdaıda kásipkerlerge Qazaqstan Respýblıkasynyń Ákimshilik quqyq buzýshylyq týraly Kodeksiniń 505-babyna sáıkes ákimshilik jaýapkershilik júkteledi.