Adamnyń jazýyna qarap, onyń minez-qulqyn, kózqarasyn boljaýǵa bolady
Adamnyń jazýyn jáne onyń jeke qasıetterimen baılanysyn zertteýge arnalǵan tutastaı ǵylym bar. Mektep tabaldyryǵyn endi attaǵan oqýshynyń jazýy áli tósele qoımaýy jáne ózgerýi múmkin, degenmen osy kezeńniń ózinde oǵan qarap, bala jaıly kóp nárse aıtýǵa bolady deıdi mamandar.
Áriptiń kólemi, basyp jazý men kallıgrafıa balalardyń minezi jaıly ne aıtatynyn bilgen artyq bolmas.
BATYRYP JAZÝ
Grafolog ǵalymdar jazý kezinde qalamdy batyryp jazý adamnyń batylyraq, kesip aıtatyn, táýekel etýden qoryqpaıtyn jáne jyldam sheshim qabyldaıtyndyǵynan habardar etýi múmkin. Al jazýy qaǵaz betinde bolar-bolmas qana kórinetin balalardyń ishki rýhy álsiz, uıańdaý jáne ózine senimsizdeý bolýy múmkin jáne olarǵa táýekeldi sheshim qabyldaý, jyldam áreket etý tán emes.
ÁRİPTERDİŃ KÓLEMİ
Bala jazýyndaǵy áripterdiń kólemi balanyń jalpy ortaǵa ashyqtyǵyn, til tapqyshtyǵyn, ózgelermen baılanysqa beıimdiligin nemese qanshalyqty tuıyq ekenin kórsetedi. Qoly ashyq, jomart jáne jyly shyraıly jandardyń qaǵaz betine túsirgen áripteri kólemdi keletini sonshalyq, dápterdiń belgilengen jolynda búkil bıiktikti alady. Mundaı adamdardyń aralasý ortasy keń, dostary kóp bolady, olar tanymaıtyn adamdarmen tez til tabysady jáne jańa adamdarmen tanystyq ornatqandy jaqsy kóredi. Áripter kishileý jáne usaqtaý bolsa, bul balanyń sarańdaý ekenin, onyń tuıyqtyǵyn jáne jalǵyzdyqty jaqsy kóretininen habar berýi múmkin.
ÁRİPTERDİŃ FORMASY
Kóptegen balalardyń jazýynda áripter dóńgelek jáne jınaqy keledi, biraq ol óse kele ózgerýi múmkin jáne súıirlene túsedi. Dóńgelenip jazylǵan áripter adamnyń meıirimdilin, kishipeıildiligin jáne mineziniń jumsaqtyǵyn bildirse, úshkirlenip jazylǵan áripter oqýshynyń ózimshildigin jáne emosıalaryn kórsetkisi kelmeıtinin ańǵartady.
KALLIGRAFIA
Bala kúninen uqypty, ádemi jazatyn oqýshylar tabıǵatynan uqypty, taza, tártipti jaqsy kóretin bolyp keledi, biraq bul olardyń óz betinshe sheshim qabyldaı alatyndaı táýelsiz ekenin bildirmeıdi. Sangvınıkterge jatqyzýǵa bolatyn sabyrly, baısaldy balalardyń jazý kallıgrafıasy erekshelenbeıdi, qarapaıym bolyp keledi. Al eger balanyń jazýy óte nashar bolsa, bul onyń óte belsendi, energıaǵa toly ekenin, ýaıymshyl emes ekenin bildiredi. Onymen qosa, bul onyń nerv jáne júıke júıesinde máseleleri bolýy múmkin ekenin baıqatady, sondyqtan da balanyń nazaryn shoǵyrlandyrý qıyn keledi.
BİRGE NEMESE BÓLEK?
Biz sózdegi ár áripti bir-birinen bólek jazyp, olardy arnaıy syzyqtarmen qosatyn adamdardy baıqaǵan bolarsyzdar. Eger birinshi synypta oqıtyn balańyzdyn jazýynan osyny baıqasańyz, bul onyń ıntýısıasy óte jaqsy damyǵanyn kórsetedi. Al eger jazý qarapaıym jáne árbir árip kelesi árippen retimen jalǵansa, bul balanyń oılaný kezinde birinshi kezekte logıkaǵa súıenetinin baıqatady.
PESIMIS NEMESE OPTIMIS?
Eger balaǵa eshbir jazý joly belgilenbegen taza paraq berip, jazý barysynda onyń áripteri tómenge qaraı jazylsa, bul balanyń aldymen barlyq jaman nusqalardy kóretinin, al pozıtıvti jaqtaryn baıqaı qoımaıtynan syr shertedi. Balańyzdyń jazýy joǵary órlep kete me? Onda bul onyń optımıs ekendigin jáne pozıtıvti oılar oılaıtynyn ańǵartsa kerek. Jolaǵy joq paraqta túp-túzý jazatyn oqýshylar realıser bolyp keledi, olar kez kelgen jaǵdaıǵa shynaıy baǵa beredi. Shytyrmandy, táýekeldi jáne qýlyqty jaqsy kóretin adamdardyń jazýlary ózgerip turady eken, jazý joly da turaqty bolmaıdy.
QAǴAZDA KÓP ORYN QALDYRA MA?
Bala kúninen óte uqypty adamdar dápterdiń eń shetinen bastap jazatynyn ańǵarýǵa bolady. Olar eshbir jol, bos oryn qaldyrmaı jazýǵa tyrysady. Al minezi de, qoly da ashyq adamdar paraqtyń ortasynan jazýy múmkin, jazý jolynda da kóp oryn qaldyrady. Balanyń jazýyna qarap, onyń minezin, bolmysyn anyqtaý úshin qolaıly jaǵdaı bolǵan kezde baǵalaý kerek. Balanyń qarny toq, jaqsy tynyqqan jáne kóńil kúıi jaqsy kezde baqylaǵan jón. Áıtpese odan shyqqan nátıje shynaıy bolmaýy múmkin, sebebi sharshap turǵan bala qalamdy batyrmaı jazýy múmkin jáne sonyń saldarynan jazýy da anyq bolmaıdy.