Almatylyq ata-analar balalaryn mektepke daıyndaýǵa qyzý kiristi.
Turǵyndardyń aıtýynsha, bıyl mektep formasy edáýir qymbattaǵan. Al memleketten beriletin 40 myń teńge tolyqqandy qajetti kerek-jaraq alýǵa jetpeıdi.
Mektepke daıyndyq barysyn Almaty-akshamy.kz Qazaqstan.tv arnasynyń materıalyna silteme jasaı otyryp habarlaıdy.
Almatylyq Baıan Turlybekova bıyl balasyn mektepke daıyndaýdy erterek kirisken. Óıtkeni oqý jylynyń basy taıap qalǵanda tańdaý az, baǵa qymbat bolady deıdi. Osy jyly kerek-jaraqtyń bárin arzandaý aldym degenniń ózinde ol bir balaǵa 100 myń teńge jumsaǵan.
«Mınımaldy baǵalardy qarap júrip alǵanda 100-110 myń teńge ketip qalady bir balaǵa. Endi aıaq kıimderdiń baǵasy qymbat. Sapasy jaqsylaýyn kórdim búgin, 20 myńnyń ar jaq, ber jaǵy», - deıdi ata-ana Baıan Turlybekova.
Jármeńke men saýda úıindegi baǵany salystyra kelip, saýdagerler Almatydaǵy ortasha baǵany eseptep berdi. Máselen, mektep formasyn aq kóılegimen 22 myń teńgege alýǵa bolatynyn aıtady. Al aıaq kıimdi 14 myńǵa, sómkeni 8 myń teńgege tabýǵa bolady. Sondaı-aq keńse taýarlaryna kem degende 7 myń teńge jumsalady eken. Bul tek bastaýysh synyp oqýshysyna bir sypyra alatyn zattar ǵana. Budan bólek, ata-analar sporttyq kıim men aıaq kıimdi de qyrkúıektiń basynda alatynymyz qaltaǵa salmaq salady deıdi.
«Jyl saıyn taýarlar qymbattaıdy. Formanyń ózine 45 myń teńgedeı jumsadyq. Odan bólek sporttyq formasy bar, áskerı forma bar, qosymsha shalbary bar, 100 myń teńgedeı ketetin shyǵar bir balaǵa», - deıdi ata-ana Sáýle Almatova.
Al memleketten áleýmettik az qamtylǵan otbasyndaǵy balalar úshin byltyr 17 myń teńge berilse, bıyl bul soma 40 567 teńge. Naqtysyn aıtqanda, qarjylaı járdem ataýly áleýmettik kómekti alyp otyrǵan otbasyndaǵy balalarǵa jáne tabysy jan basyna shaqqanda 41 myń teńgeden aspaıtyn otbasyndaǵy oqýshylarǵa beriledi. Sondaı-aq ata-anasynyń qamqorlyǵynsyz qalǵan nemese tótenshe jaǵdaıdan zardap shekken otbasyndaǵy balalarǵa da kómek kórsetiledi. Ol úshin árbir ata-ana mektepke baryp, ótinish jazýy qajet.
«Zańnamaǵa sáıkes, ótinish 15 kún ishinde qaralady. Arnaıy qurylǵan komısıa bilim berý uıymynyń janynan otbasynyń baryp jaǵdaıyn zertteıdi, aktileıdi, tıisti qorytyndysyn shyǵarady. Osy oraıda atap ketetin bir jaıt, ótken jyldan bastap kóp ata-analardyń usynysy negizinde, suranys negizinde ata-analadyń ózderi balalarymen birge tańdap kıim alý múmkindigin týǵyzý úshin kómek qarjylaı negizde júzege asady», - deıdi QR Oqý-aǵartý mınıstrligi Balalardyń quqyqtaryn qorǵaý komıteti tóraıymynyń orynbasary Joldas Batyrhan.
Alaıda kómek alǵan ata-analar jármeńkeniń jeńildigin paıdalana almaıdy. Saýdagerler onyń sebebin bylaı dep túsindirdi.
«Mektepten ol kisilerden chek suraıdy. Al chektiń ishinde túgel fıskaldy chekte taýardyń túgel aty bolýy kerek. Al jármeńkede túgel atyn jazyp bere almaımyz. Biz tek móri bar taýar chegin bere alamyz. Al ol jerde ár taýardyń aty kerek. Ata-analarǵa qıyndaý, qymbat-qymbat alady taýarlardy», - deıdi satýshy Gúlmıra Dáýitálıeva.
Iá, barlyq aqsha aýdarymdary ata-analardyń kartalyq shottary arqyly júrgiziledi. Aıta keteıik, bıyl mundaı materıaldyq kómek 400 myńnan astam oqýshyǵa beriledi.