Balalar jyly aıasynda Ábilhan Qasteev atyndaǵy Qazaqstan Respýblıkasynyń Memlekettik óner mýzeıinde «Altyn besik» kórmesiniń ashylý saltanaty ótti.
Kórmege keskindemelik, grafıkalyq jáne músindik 80-nen asa týyndy, esh jerde jarıalanbaǵan, balalar taqyrybyna baılanysty qazaq, orys jáne sheteldikterdiń sýretteri qoıyldy.
«Qazaqstan óneri» bóliminde balalar portreti janry boıynsha A.Ǵalymbaevanyń «Sáýleniń portreti», I.Toqaıdyń «Alma», Iý.Zaısevtiń «Pıoner Narıman» shyǵarmalary qoıylǵan. Sondaı-aq, Q.Teljanovtyń «Alǵash ret», E.Gorovyhtyń «Qıyn tapsyrma», Á.Júsipovtiń «Alǵashqy oqý», M.Tolokonnıkovanyń «Bala baqshadaǵy tań», R.Velıkanovanyń «Tabıǵatpen kezdesý» jáne t.b. kartınalary balalar ómirinen syr shertedi. Máselen mekteptegi sabaqta taqta aldynda oqýshynyń jaýap berýi, apasyna kitap oqyp berip jatqan bala, saıabaqta júrgen qyz jáne t.b kórinister shynaıy shyqqan. Bul kórinister balanyń ishki jaı-kúıin berip, balalyq qýanyshy men muńyn jaıyp salyp turǵandaı.
«Kórmege qyzym ekeýmiz birge keldik. Ol sýret salýdy jan-tánimen jaqsy kóredi. Kartınalardy kórip otyryp, kishkentaı kezderim esime oraldy. Apanyń aldyna otyryp alyp ertegi tyńdaıtyn kezderimdi, mektep qabyrǵasynda oqyp júrgen sátterimdi saǵyndym. Qarap otyrsam, búgin mýzeıge kishkentaı baldyrǵandar kóp kelipti, bul da bir ónerli baldyrǵandar sanynyń artyp kele jatqanynyń dáleli bolar», – deıdi Dınara Ábilqasym esimdi qala turǵyny.
Rasymen-aq, kórmege kelýshilerdiń kóbisi derlik baldyrǵandar. Sýretshilerdiń týyndylary kóńilderinen shyqqanyn birden baıqaýǵa bolady. Kórmede búldirshinderdiń obrazy men minez-qulqyn dál taýyp, kórkemdik talǵammen jazylǵan sýretterdi kóbirek baıqadyq.
Ekspozısıada Á.Qasteevtiń «Balalardyń týrısik joryǵy». «Jas natýralıser», S.Kımniń «Aıý ustaǵan qyz bala» shyǵarmalary men «Qyryq ótirik» ertegisiniń jelisinde jazǵan S.Romanovtyń «Bala hanǵa ótirik áńgime aıtýda», «Bala han aldynda» ılústrasıalary jaıǵasqan. E.Sıdorkınniń «Ózbek qyzy», B.Tabyldıevtiń «Balalyq shaǵy» jáne t.b. týyndylar da júrekti terbeıdi.
Ekspozısıanyń ekinshi bólimi shet el óneri qorynan alynǵan shyǵarmalardy usyndy. Munda Reseı, Latvıa, Lıtva, Batys Eýropa elderi sýretshileriniń jumystaryn tamashalaýǵa bolady.
Kórmede HİH ǵasyrdaǵy orys óneriniń keskindemesinen habar beretin A.Venesıanovtyń «Sasha Panaevtyń portreti», S.Zaránkonyń «Vaná Lazarevtiń portreti» jáne t.b. týyndylar oryn alǵan.
«S.Zaránko A.G.Venesıanovtyń shákirti bolǵan, ol boıyndaǵy búkil darynyn bir ǵana portret janryna beredi. «Vaná Lazarevtiń portreti» onyń ata-anasynyń tapsyrymen jasalǵan, óıtkeni ol ımperatorlyq otbasynyń óte tanymal sýretshisi bolǵan. Zaránkonyń portretteri erekshe muqıattylyǵymen kórermenderdi ózine tartady», – deıdi ekskýrsıa jetekshisi Aıgerim Aıdarbek.
HH ǵasyrdyń grafıkalyq ónerinde jańa sapa, erekshe obraz paıda boldy. Bul qazirgi adamnyń ómirindegi rýhanı prosesterdi jan-jaqty tereń taldaýǵa degen umtylystan týyndaǵan. Keńestik kórnekti grafıkterdiń biri, balalar kitabynyń sýretshisi Alekseı Pahomovtyń «Mektepte» jáne «Qaratorǵaıdyń uıalary» atty grafıkalyq jumystar osynyń mysaly. Ol bala psıhologıasyn tereń túsinýge tyrysqan.
Natýradan túrli nobaılar jasaı otyryp, sýretterinde balalardyń plasıkalyq qyzyqty keıipteri men qımyldaryn dál ańǵaryp, olardy jıi beınelegen. Sýretshiniń úzdik grafıkalyq týyndylarynyń balalarǵa arnalǵany daýsyz. Ekspozısıanyń grafıkalyq bóligine R.Gıbavıchústiń «Ana», K.Kalınychevtiń «Eski saıajolda», M.Feıgınniń «Qyzyq kitap», K.Mamonovtyń «Baqbaq tergen bala» atty jumystary qoıylǵan.
Keskindemelik, grafıkalyq jumystarda balalardyń oınap júrgen sátteri, kishkentaı keıipkerlerdiń baqytty sátteri sekildi balalyqtyń túrli kezeńderi kórinis tapqan. Keıbir shyǵarmalardan keıipkerdiń kitap oqyp otyrǵanyn nemese sportpen berile aınalysyp jaqtandyǵyn baıqaýǵa bolady.
Kórmeden oryn alǵan týyndylarǵa qarap otyryp, balalardyń kóńildi sátterine, oıly júzderine qanyq bolasyz. Sondaı-aq, balalyq shaqqa saıahattap qaıtqandaı sezimge bólenýińiz ǵajap emes.