Alıment tólemegen 3 myńǵa jýyq boryshker ákimshilik jaýapkershilikke tartyldy.
Balalarynyń aldyndaǵy qaryzdaryn óndirip alý úshin 2 myńnan astam jumyssyz alımentshi jumysqa ornalastyryldy, dep habarlaıdy Almaty-akshamy.kz Elorda.info-ǵa silteme jasap.
Búgingi tańda 263 memlekettik jáne 2111 jeke sot oryndaýshysy jumys isteıdi. Olardyń óndirisinde 20 trln teńgege jýyq 7,2 mln atqarýshy óndiris bar. Atqarýshylyq is júrgizýdiń 40%-y aıaqtaldy. Bul týraly Ortalyq komýnıkasıalar qyzmetinde ótken baspasóz konferensıasynda ádilet mınıstri Azamat Esqaraev aıtty.
Onyń aıtýynsha, atalǵan sannyń edáýir bóligin alıment óndirip alý jónindegi qujattar quraıdy. Respýblıka boıynsha bul 303 myńnan astam nemese óndiristiń 4% quraıdy.
«2023 jyldyń 6 aıynda alıment tólemderi boıynsha sot aktilerin oryndamaǵany úshin 2 861 boryshker ákimshilik jaýapkershilikke tartyldy. 7 219 boryshkerge qatysty elden shyǵýǵa ýaqytsha tyıym salyndy. Alıment óndirip alý týraly barlyq problemalyq atqarýshylyq is júrgizý boıynsha sot oryndaýshylary májbúrleý sıpatyndaǵy sharalardy qabyldaýda», - dedi vedomstvo basshysy.
Mınıstrdiń aıtýynsha, keıde olar boryshkerden alıment óndirip ala almaıdy, óıtkeni onyń turaqty tabysy men múlki joq. Osyǵan baılanysty, óńirlik ádilet departamentteri ákimdiktermen birlesip boryshkerlerdi jumysqa ornalastyrý úshin turaqty negizde bos jumys oryndary jármeńkesin ótkizedi. Mysaly, 2023 jyldyń 8 aıynda respýblıka boıynsha 2 101 boryshker jumysqa ornalastyryldy.