Qarasaı aýdanyndaǵy mektep asqanasynda balalarǵa eskirgen ıogýrt bergen
Almaty oblysynda oqýshylarǵa jaramdylyq merzimi 2 jyl buryn ótip ketken ıogýrt berilgen, dep habarlaıdy Almaty-akshamy.kz
Balalarǵa qatysty kezekti jaǵa ustatar jańalyq Qaznette tez tarady. Áleýmettik jelidegi aqparatqa súıensek, balalarǵa tegin ystyq tamaqtan bólek, 2021 jyly jaramdylyq merzimi ótip ketken "Rastıshka" ıogýrty berilgen.
"Men qatty shoshyp kettim, búgin balam mektepte jaramdylyǵy ótken ıogýrt jegen. Qalǵanyn úıge ákeldi. Balalarǵa merzimi ótip ketken tamaqty qalaı berýge bolady, bala ýlansa, kim jaýap beredi", "Bul ónimdi kim satyp aldy? Jaramsyz tamaq bergenshe, múldem tamaqtandyrmaǵan durys", – deıdi ata-ana.
Mektep basshylyǵy ónim jetkizýshini ózgertý jáne kelisimshartty buzý týraly sheshim qabyldanǵanyn, is sotqa jiberiletinin habarlady. Jetkizýshiniń ózi kóterme bazardan ónim alǵan kezde jaramdylyǵy ótip ketken ónimderdi baıqamaı qalǵanyn aıtyp aqtaldy.
Qarasaı aýdanynyń bilim bólimindegiler de oqýshylarǵa merzimi ótken ónimdi berý faktisin rastady.
«Aqparatty rastaý úshin shuǵyl jumys toby qurylyp, orta mekteptiń asqanasyn tekserýge jiberildi. Tekserý nátıjeleri boıynsha tamaqtaný sapasyna monıtorıń aktisi jasaldy. Tártiptik jaza jarıalandy, kásipkerge habarlama jiberildi, asqana baqylaýǵa alyndy», - dedi vedomstvodan.
İske polısıa da aralasty. Almaty oblysy PD bastyǵy Baýyrjan Álenovtyń aıtýynsha, QR QK 306-babynyń 2-bóligi boıynsha qylmystyq is qozǵalǵan.