Almatylyq dáriger balalarǵa neshe jasta jáne ne úshin aýdıologıalyq skrınıng júrgiziletinin aıtyp berdi.
Almaty №36 qalalyq emhananyń pedıatrıa bóliminiń meńgerýshisi Dınara Qaıypovanyń aıtýynsha, aýdıologıalyq skrınıng jańa týǵan náreste men kishkentaı balalardyń estý qabiletiniń buzylýyn der kezinde anyqtaý, múgedektikke ákep soqtyratyn aýrýlardyń aldyn alý jáne ońaltý maqsatynda júrgiziledi, dep habarlaıdy Almaty-akshamy.kz.
Aýdıologıalyq skrınıng eki kezeńde júrgiziledi.
Birinshi kezeń - jańa týǵan nárestege ómiriniń alǵashqy 24-72 saǵatynda perzenthanada ótkiziletin neonataldy aýdıologıalyq skrınıng.
Ekinshi kezeń – jas sanattary boıynsha: 3 aı, 1 jas, 2 jas, 3 jas, 6 jasty qosa alǵanda emhananyń balalardy damytý kabınetinde júrgiziledi.
«Eger bala qandaı da bir sebeppen perzenthanada aýdıologıalyq skrınıngten ótpese, onda stasıonardan shyǵarylǵannan keıin tirkelgen jerdegi medısınalyq uıymnyń balalardy damytý kabınetine birinshi kezeńdegi aýdıologıalyq skrınıng júrgizý úshin sıgnal jiberiledi», - dep bólisedi Dınara Qaıypova.
Ekinshi kezeńdi ótkizý úshin emhana qyzmetkeri aldymen jeke jáne jazbasha shaqyrý, jadynamalar, únparaqtar, telefon baılanysy, habarlamalar nemese qoljetimdi mobıldi medısınalyq qosymshalar arqyly aýdıologıalyq skrınıng júrgizý qajettiligi týraly bekitilgen turǵyndarǵa habarlaıdy.
Pedıatr júrgizetin ekinshi kezeńdegi aýdıologıalyq skrınıng júrgizýdiń mindetti sharty zertteý kezinde balada jedel respıratorlyq jáne juqpaly aýrýdyń bolmaýy.
«Eger balada estý qabiletiniń joǵalýy anyqtalsa, bala dınamıkalyq baqylaýǵa alynady jáne barlyq qajetti emdeý sharasy júrgiziledi, atap aıtqanda, balaǵa jáne ata-anasyna sýrdopedagogpen estý qabiletiniń buzylýy anyqtalǵan sátten bastap, qaldyq estý qabiletin, kommýnıkatıvti daǵdylardy - sóıleý, aqyl-oı fýnksıalary, motorıkany damytý boıynsha sabaqtar ótkiziledi», - dep túıindedi maman.