Jańa oqý jyly qarsańynda Almaty qalasynyń polısıa qyzmetkerleri jolaýshylar tasymalynyń, sonyń ishinde mektep avtobýstarynyń jaı-kúıin jáne bilim berý mekemeleriniń mańyndaǵy kóshe-jol ınfraqurylymyn keshendi túrde tekserdi.
Balalardyń joldaǵy qaýipsizdigine erekshe kóńil bólindi. Osylaısha, 200 mektep avtobýsyn paıdalanýǵa beretin avtokásiporyn tekserildi. Bul avtobýstar qaladaǵy 57 mektepke oqýshylardy tasymaldaıdy, dep habarlaıdy aqshamnews.kz.
Barlyq kólikter 2023–2024 jyldary satyp alynǵan jáne zamanaýı qaýipsizdik júıelerimen jabdyqtalǵan: 6 beınebaqylaý kamerasy (salonda jáne syrtta), qaýipsizdik beldikteri, órt sóndirý júıeleri, qozǵalysy shekteýli jolaýshylarǵa arnalǵan pandýstar ornatylǵan. Avtoparkte júrgizýshiler mindetti túrde reıs aldyndaǵy medısınalyq tekserýden ótetin medısınalyq kabınet jumys isteıdi.
Oqý jylyna daıyndyq aıasynda polısıa qyzmetkerleri Almaty qalasynyń mobıldilik basqarmasy jáne ákimdikpen birlesip kelesi jumystardy atqardy: 216 mekteptiń mańyndaǵy kóshe-jol jelisi tekserildi; anyqtalǵan kemshilikterdi joıý boıynsha 275 nusqama berildi; 300 jol belgisi aýystyryldy jáne jańadan ornatyldy, taǵy 358 belgi jańartyldy; 8 myń sharshy metrden astam jol tańbasy syzyldy; 207 rettelmeıtin jaıaý júrginshiler ótkeli jaryqdıodty shamdarmen jaryqtandyryldy; 101 bilim berý mekemesiniń mańyna temir qorshaýlar ornatyldy.
Sonymen qatar 30 jańa baǵdarsham jáne 80 retteletin jaıaý júrginshiler ótkelin salýǵa jobalyq-smetalyq qujattama daıyndaldy. Olardyń bir bóligi mektepterdiń janynda ornalasqan.
— Balalardyń joldaǵy qaýipsizdigi – polısıanyń basty basymdyǵy. Biz jolaýshylar tasymalyna baqylaýdy kúsheıtip, jol belgileri men tańbalaryn jańartyp, zamanaýı tehnologıalardy engizip jatyrmyz. Ata-analar men ustazdar da balalarǵa jolda júrý erejelerin eske salyp otyrǵany mańyzdy. Tek birlesken kúsh-jigerimiz arqyly ǵana biz, balalardyń jaraqat alýyn azaıtyp, mektepke deıingi qaýipsiz joldy qamtamasyz ete alamyz, – dedi Almaty qalalyq PD ákimshilik polısıa basqarmasynyń bastyǵy Asqat Kulbaev.
Sondaı-aq Almatyda jol-kólik oqıǵalarynan bolatyn ólim-jitimdi azaıtýǵa baǵyttalǵan “Vision Zero” tujyrymdamasy belsendi túrde júzege asyrylýda. Bul sheńberde jyldamdyqty shekteý, “qaýipsizdik aralshyqtary”, jasandy jol budyrlary syndy keshendi sharalar qarastyrylǵan. Búginde mektepterdiń mańynda 20-dan astam jasandy jol budyry men 10 “qaýipsizdik múıisi” ornatyldy.