1 qyrkúıekten bastap bastaýysh synyptaǵy barlyq oqýshyǵa tegin ystyq tamaq beriledi.
Bul týraly Oqý-aǵartý mınıstri Ǵanı Beısembaev Memleket basshysyna jańa oqý jylyna daıyndyq jumystary týraly baıandaý kezinde aıtty, dep habarlaıdy Almaty-akshamy.kz.
«Qazir mektep aldyndaǵy daıarlyqqa baılanysty tıisti jumystar iske asyrylyp jatyr. Birinshi kezekte tárbıeshilerdiń eńbekaqysy 30 paıyzǵa kóterilip jatyr. 1 qyrkúıekten bastap balabaqshaǵa baratyn az qamtylǵan otbasylardaǵy 97 myńnan astam bala tegin tamaqpen qamtamasyz etiledi. Balabaqshada 30 myń oryn ashylyp otyr jáne jyldyń aıaǵyna deıin taǵy da 51 myń oryn ashý josparlanǵan. Qazirgi kezde balalardyń 89 paıyzy (2-den 6 jasqa deıingi) qamtylǵan. Sonymen qatar jyldyń sońyna deıin kezektilik máselesi boıynsha biryńǵaı baza iske qosylady», - dedi Ǵ. Beısembaev.
Onyń aıtýynsha, jergilikti búdjet qarajaty esebinen az qamtylǵan otbasylardaǵy oqýshylar 100% mektep formasymen jáne keńse taýarlarymen qamtamasyz etiledi. Bıyl jalpyǵa birdeı bilim berý qory 65 mlrd teńgeden astam somany qurady. Osy oraıda 460 myń oqýshyǵa materıaldyq kómek berý josparlanǵan.
«1 qyrkúıekten bastap 1,4 mln bala (bastaýysh synyptardaǵy) tegin ystyq tamaqpen qamtamasyz etiledi. 1 qyrkúıekke deıin barlyq bilim berý mekemesi jedel basqarý ortalyǵyna, lısenzıalanǵan kúzetke, dabyl júıesine qosylýy máselesi tolyqqandy júıeli túrde sheshilip otyr. Mektepterdiń 65 paıyzy modernızasıadan ótti. Osyǵan deıin 1 myń pándik kabınetter ashý josparlansa, onyń ornyna 1700 kabınet ashylady», - dedi mınıstr.
Onyń sózine qaraǵanda, jyl sońyna deıin 154 mektep paıdalanýǵa beriledi. Munymen qosa, 260 mektepte kúrdeli jóndeýmen qamtylǵan. Sonyń arasynda 194-i jańa oqý jylyna deıin tapsyrylady.