Elimizdiń İshki ister mınıstrligi balalardy túrli qaýipten saqtaý sharalaryn taǵy bir eske saldy.
Balalarǵa jasalýy múmkin qaýip pen qaterden olardy qalaı qorǵaý kerektigi jaıly QR İİM-de ótken brıfıńte balalar qaýipsizdigin qamtamasyz etý máselesi kóterildi, dep habarlaıdy Almaty-akshamy.kz QazAqparatqa silteme jasap.
«Bala tanymaıtyn eresek adamdarmen sóılespegeni jón, bógde kisi áńgimege tartqan jaǵdaıda da oǵan mán bermeý kerek. Tanymaıtyn adamdar bergen tátti nemese basqa da syılyqtardy almaǵany abzal. Eger bóten kisi syılyqty qoımaı usynyp jatsa, onda ata-anasyna habarlassyn. Ata-analarǵa eskertý, eger aram oıy bar adam balany ońashaǵa alyp ketkisi kelse, ol balany ártúrli tásilmen aldap-arbaıdy. Mysaly, oıynshyq alyp beredi, uıaly telefonnan jańa oıyn túrin kórsetedi nemese kúshik jáne mysyqtyń balasyn kórsetemin dep aldaýy múmkin. Joǵaryda atalǵan jaıttardyń aldyn alý úshin balaǵa túsindirgen jón», - dedi QR İİM Ákimshilik polısıa komıteti basqarmasy basshysynyń orynbasary Jasulan Jumanalın atalǵan vedomstvoda ótken baspasóz máslıhatynda.
İİM ókiliniń keńesinshe, eger jaǵdaı adam joq jerde oryn alsa, bala aıǵaılap, múmkindiginshe qarsylyq kórsetip, qashýǵa tyrysýy kerek.
«Eger bala izinen bógde adamnyń erip, ańdyp kele jatqanyn baıqasa, kóp qabatty úıdiń kireberisine jalǵyz kirmegeni abzal. Dalada tura tursyn nemese tanys kórshilerimen birge kirsin. Bolmasa úıindegilerge habarlasyp kireberisten kútip alýyn surasyn. Al eger bala úıdiń kirebersine jalǵyz kirip, artynan tanymaıtyn eresek adam kirse, onda lıftige minbegeni durys. Eger qaýip baıqalsa, kórshilerdi kómekke shaqyrsyn. Túrli qaýiptiń aldyn alý úshin osy atalǵan saqtyq sharalary týraly balalarǵa jıi eskertip otyrý kerek», - deıdi ol.