Balany ekrannyń arǵy jaǵyndaǵy nıeti túzý emes adamdardan qorǵaýǵa kómektesetin ınternettegi qaýipsizdiktiń qarapaıym erejeleri.
Polıseılerdiń ázirlegen usynystaryna súıensek, ata-ana kámeletke tolmaǵan balanyń ınternettegi qyzyǵýshylyqtaryn múmkindiginshe baqylap otyrý kerek, dep habarlaıdy almaty-akshamy.kz.
Jeke derekterińizdi bógde adamdarǵa aıtpańyz. Tanys emes tulǵalardan túsetin dostyqty qabyldamańyz, olardyń nusqaýlaryn oryndamańyz.
Balalarǵa eshbir jaǵdaıda jeliniń basqa paıdalanýshylaryna ózderiniń derbes derekterin, ıaǵnı aty-jónin, tegin, týǵan kúnin, turǵylyqty mekenjaıyn, oqý ornyn, telefonyn, fotosýretterin jáne t.b. aqparatty aıtýǵa bolmaıtynyn túsindirý qajet.
Budan bólek, áleýmettik jeli qoldanýshylary senimge kirý úshin oıdan shyǵarylǵan derekterdi, sonyń ishinde basqa adamdardyń nemese tipti balalardyń fotosýretterin paıdalanatyn kezder bolady. Osyǵan baılanysty belgisiz adamdardan dostyqty qabyldamaý jáne olardyń buıryqtary men nusqaýlaryn oryndamaý usynylady. Eń durysy – suhbattasyp jatqan adamnyń paraqshasyn buǵattaý.
Internet qoldanýshylar tarapynan túsken qaýipten qoryqpańyz. Qashyqtan qol jetkizý baǵdarlamalaryn ornatpańyz.
– Internet-paıdalanýshylar sizge qoqan-loqqy kórsetse, ýaıymdamańyz. Olar sizge de, jaqyndaryńyzǵa da eshteńe isteı almaıdy. Olar ádette balalardy baqylaýǵa alý úshin qorqytady. Birinshi qaýip tóngen kezde balalar bul týraly ata-anasyna, ápke-baýyrlaryna, muǵalimine jáne t.b dereý uıalmaı, aıtý kerek, – dep atap ótti vedomstvoda.
Sondaı-aq polısıa qashyqtan qol jetkizý úshin baǵdarlamalardy ornatpaýǵa keńes beredi. Bundaı qosymshalardy ornatpas buryn, ol týraly ınternette oqyp, onyń ne úshin qajet ekenin bilip alý kerek.
Ata-analarǵa usynys: balany ınternettegi qaýipsizdiktiń negizgi erejeleri týraly habardar etińiz, sondaı-aq ony bógde adamdar men qajetsiz kontentten qorǵaýǵa kómektesetin ata-ana baqylaýy, qaýipsiz izdeý sıaqty parametrlerdi qoldanyńyz.