Úsh aıdyń ishinde respýblıka boıynsha balalardy 1-synypqa qabyldaýǵa 320 myńǵa jýyq ótinish túsken. Onyń ishinde balalardyń 70%-ke jýyǵy memlekettik tilde oqýdy tańdady, dep habarlaıdy Almaty-akshamy.kz Almaty.tv-ge silteme jasap.
"Ata-analarǵa qujattardy tezirek tapsyrýǵa keńes beremiz, óıtkeni qabyldaý 1 tamyzda aıaqtalady. Sodan keıin mektepterde oqý-tárbıe úrdisin sapaly josparlaý men uıymdastyrý, oqýlyq taratý, synyptardy qalyptastyrý jáne basqa da uıymdastyrý jumystary bastalady. Qujat qabyldaý bastalǵanyna úsh aı ótti jáne osy ýaqyt ishinde 320 myńǵa jýyq ótinish tústi. Onyń 82%-y elektrondy formatta qabyldandy", - dedi oqý-aǵartý mınıstrligi mektepke deıingi jáne orta bilim komıtetiniń tóraǵasy Gúlmıra Kárimova.
Memlekettik tilde bilim alǵysy keletinderdiń úlesi 70%-ke jýyqtaǵan. Qazaq tilinde oqytatyn synyptarǵa qabyldaý boıynsha eń joǵary kórsetkish Qyzylorda (92,4%), Túrkistan (89%) jáne Mańǵystaý (87,1%) oblystarynda tirkeldi.
Oqý-aǵartý mınıstrligi jańa oqý jylynda 400 myńnan asa búldirshin 1-synypqa barady dep boljap otyr.
Aıta keteri, birinshi synypqa qujat qabyldaý 1 sáýirde bastaldy. Ol 1 tamyzǵa deıin jalǵasady. Ata-analarǵa yńǵaıly bolý úshin qujattar egov.kz veb-portaly arqyly qabyldanady. Sondaı-aq qujattardy dástúrli qaǵaz formatynda da tapsyrýǵa bolady.