Naýryzbaı qajy Taǵanuly, QMDB tóraǵasy, Bas múftı
Asa qamqor, erekshe meırimdi Allanyń atymen bastaımyn!
Búgin Memleket basshysynyń qatysýymen Qazaqstan halyq Assambleıasynyń keńeıtilgen otyrysy ótti. Otyrysta birneshe jaqsy baıandamalar jasaldy. Sonyń ishinde Analar keńesiniń músheleriniń baıandamalaryn atap aıtqan jón. Analar - qazirgi tańda bizdiń qoǵamdy tárbıeleýshilerdiń ishindegi eń negizgisi. Adam balasy dúnıe esigin ashqan kezde, "ana" degen medresede oqıdy jáne "ana" degen tárbıeshiniń tárbıesin alady. Sondyqtan qoǵamdy tárbıeleýde ananyń roli zor. Qazirgi zamanǵy ózekti taqyryptar boıynsha óte tamasha baıandamalar jasady. Qazaqstan halyq Assambleıasynyń óńirdegi ókildikter arasynda analar mektebine erekshe kóńil bólý kerektigi aıtyldy. Sonymen qatar, baıandamashylar tarapynan ınternet júıesine qatysty máseleler de qozǵaldy. Qazirgi tańda balalardyń ınternetke kóp ýaqytyn jumsaıtyndyǵy týraly problemalar kóterildi. Sonyń aldyn alý úshin balalardyń tárbıesine erekshe kóńil bólý, olardy sportqa baýlý jóninde Memleket basshysy tarapynan qoldaý kórsetildi. Osy turǵyda jergilikti bılik ókilderine jumysty jetildirýge naqty tapsyrmalar berildi. Balalardyń smartfonmen kóp ýaqyt ótkizetinine baılanysty jáne taǵy basqa máselelermen Memleket basshysy, óńirlik bılik ókilderi jáne halyq bolyp birlesip kúresetin bolsaq, bul jarqyn bastama bolmaq.