Etnomádenı ortalyq ókili Prezıdenttiń Assambleıa keńesinde aıtqan bastamalaryn qoldaıdy
Qazaqstan Prezıdenti Qasym-Jomart Toqaevtyń qatysýmen ótken Qazaqstan halqy Assambleıasynyń keńeıtilgen otyrysynda aıtylǵan máselelerge qatysty «Qazaqstan uıǵyrlarynyń respýblıkalyq etnomádenı ortalyǵy» qoǵamdyq birlestiginiń tóraǵasy Shaımardan Nurymov óz oıyn bildirdi, dep habarlaıdy Almaty-akshamy.kz
Etnomádenı ortalyq ókiliniń aıtýynsha, eldegi til máselesin ol únemi aıtyp júredi. Qazaq jerinde turǵandyqtan, osy eldiń memlekettik tilin árbir adam bilýi tıis dep sanaıdy.
«Men ózim osyǵan deıin Qazaqstan Parlamentiniń depýtaty bolǵanymda, birneshe gazet-jýrnaldarda osy pikirimdi aıtqanmyn. Egemendi elde ómir súrip jatqanymyzǵa 30 jyl boldy. Biz qazir qazaq jerinde, Qazaqstan elinde turyp jatyrmyz. Sol úshin keńeste sóz sóılegen áriptesterimmen birge Prezıdentimizdiń sózin qoldaımyn. Aıtarym - árbir qazaqstandyq memlekettik tildi jáne qazaq tilin meńgerýi kerek. Qazaqstandyq bolǵandyqtan, bilýge tıisti», - deıdi etnomádenı ortalyq basshysy.
Shaımardan Nurymov basqaryp otyrǵan etnomádenı ortalyqta da memlekettik tildi úırený máselesi alǵa qoıylǵan. Aıtýynsha, Qazaqstan uıǵyrlarynyń birlestigi kóp jyldardan beri osy baǵytta jumys istep kele jatyr. Qazaq tilin úıretý toptary ashylǵan. Onda muǵalimder til úıretip, kóptegen kezdesýler ótedi.
Sonymen qatar, spıker Prezıdenttiń Assambleıa keńesinde Dostyq úılerin ashý bastamasyn qoldaıtynyn aıtty.
«Prezıdentimiz Dostyq úıleri jaıynda óte jaqsy pikirlerin bildirdi. Dostyq úıleri tek jınalys ashatyn oryn emes, ol Qazaqstandaǵy ártúrli etnos ókilderiniń bir-birimen týysqandaı aralasyp, is-sharalar ótkizetin oryn bolsyn dep aıtty. Bizdiń Almatydaǵy Dostyq úıi shyn máninde osy kúnge deıin de sondaı is-sharalarǵa atsalysyp kelgen. Uıǵyr mádenı ortalyǵy aıyna bir ret sondaı keń aýqymdaǵy is-sharalar ótkizip turady», - deıdi Shaımardan Nurymov.
Etnoortalyq jaqynda Táýelsizdiktiń torqaly toıyna arnalǵan úlken is-shara ótkizgen.