Jańa oıynshyny tartqany úshin – vırtýaldy depozıtke 20% paıda tabýǵa ýáde beredi
Pıramıda jasaýshylar óz sqemalaryna múmkindiginshe kóp adamdy tartý úshin oıyn-saýyq formatyn qoldana bastady, dep habarlaıdy Almaty-akshamy.kz.
Olar ekonomıkalyq nemese ınvestısıalyq onlaın-oıyndardy oılap tapty, onda oıynshylar joǵary kiris taýyp, sodan keıin óz qarajattaryn ala alady-mys. Bul jaǵdaıda paıdalanýshylardyń jasy mańyzdy emes. Qumarlyq qaıda ákelýi múmkin jáne vırtýaldy shyndyqta aldaýdy qalaı áshkereleýge bolatyny týraly Fingramota.kz aıtyp beredi.
Bul vırtýaldy taýarlardy: qustar, janýarlar, jyljymaıtyn múlik nemese basqa aktıvti naqty aqshaǵa nemese krıptovalútaǵa satyp alýǵa, ınvestısıalaýǵa jáne paıda tabýǵa bolatyn onlaın-oıyndar. Mundaı oıyndardy jasaýshylar bonýstar nemese basqa syıaqy bere otyryp, paıdalanýshylardy jańa qatysýshylardy ákelýge shaqyrady.
Mundaı oıynnyń tanymal mysaldarynyń biri – «Kóńildi balyqshylar». Onlaın-oıyn saıtynda bul joba «Kem degende sizdiń qarjylyq jaǵdaıyńyzdy jaqsartý úshin jasalǵan» dep jazylǵan. Ol úshin oıynǵa qatysýshylar balyqshylardy satyp alýy kerek – oıynda olardyń toǵyzy bar. Olardyń jaramdylyq merzimi ártúrli – 20-dan 100 kúnge deıin jáne olar ár túrli kiristilik ákeledi.
alyqshylar kún saıyn satylýǵa tıis «balyqty» aýlaıdy. Paıdalanýshylar jalqaý bolmaýy kerek, «paıda» kúıip ketpes úshin oıynǵa kún saıyn kirý kerek. Sodan keıin, belgili bir mólsherde vırtýaldy aqsha jınalǵan kezde, olardy naqty aqshaǵa aınaldyryp, shyǵaryp alýǵa bolady. Árıne, shyn máninde bul olaı emes.
Uqsas qaǵıdat boıynsha jumys isteıtin onlaın-jobalardyń taǵy biri – «Qarańǵy oıyn», ony jasaýshylar kúnine 70%-ǵa deıin, al jańa oıynshyny tartqany úshin – vırtýaldy depozıtke 20% paıda tabýǵa ýáde beredi, tanymal «Ferma» oıyny negizinde qurylǵan «Aqsha fermasy» jáne basqalary da osyǵan uqsaıdy.
«Aqsha tabýdy» bastaý úshin oıynshylar saıtta óz derekterin qaldyryp, onlaın-oıynǵa tirkelip, paıdalanýshynyń kelisimin qabyldaýy kerek, osylaısha resýrsqa jeke derekterdi óńdeýge kelisim berýi kerek. Keıbir kompanıalar paıdalanýshynyń kelisiminde, keıde usaq qariptermen qaıtarýǵa múldem kepildik joq ekenin kórsetedi. Mysaly, «Baı qustar» oıynynyń sıpattamasynda «Uıymdastyrýshy sizge oıyn ishinara qarjy pıramıdasynyń qaǵıdattaryna negizdelgenin eskertedi jáne kez kelgen ýaqytta siz barlyq qarajatyńyzdy joǵaltýyńyz múmkin, bul rette saıt uıymdastyrýshysyna eshqandaı shaǵym bolmaıdy!» dep jazylǵan.
Kóptegen adamdar bul oıyndarǵa aıtarlyqtaı mán berip, olardyń aınalasynda dúrbeleń týdyrady. Olar eger oıynda vırtýaldy kiris alsam, naqty shotqa da qarajat túsedi dep senedi. Nátıjesinde oıyn ishindegi «ınvestısıalyq ónimge» suranys arta túsedi, biraq odan tys jerde oıynǵa qatysýshylar aqshaǵa nemese krıptovalútaǵa satyp alatyn bul «ónimniń», ádette, eshqandaı qundylyǵy bolmaıdy.
Aqshanyń da, jańa paıdalanýshylardyń da aǵyny toqtaǵan kezde, oıyn jabylady, salynǵan qarajatty alý múmkin emes. Sóıtip, oıynshy ınvestorlar san soǵyp qalady. Ókinishke oraı, mundaı alaıaqtyq sqemalarǵa oqýshylar men stýdentter jıi túsip qalady, olar ózderiniń sengishtigi men qumarpazdyǵynyń saldarynan qarjy pıramıdalaryna qarsy tura almaıdy.