Saǵadat Nurmaǵambetov atyndaǵy Qurlyq áskerleri áskerı ınstıtýtynyń kýrsanttary, «Kırov» áskerı-patrıottyq klýby jáne polkovnık Borıs Kerimbaev atyndaǵy № 95 jalpy bilim beretin mekteptiń tárbıelenýshileri Almaty qalasynyń 2-shi qalalyq balalar aýrýhanasynda bolyp, balalardy kele jatqan Jańa jylmen quttyqtady.
Bolashaq ofıserler men «Jas sarbaz» áskerı-patrıottyq qozǵalysynyń tárbıelenýshileri tórt bólimsheni aralap, júzden astam balaǵa qýanysh syılady. Olardyń merekelik is-sharany uıymdastyrýǵa shyǵarmashylyqpen kelgeni baıqalyp turdy. Balalar jatqan palataǵa álpınıs Aıaz ata terezeden túsip tań qaldyrdy. Aıaz atanyń rólin bes jyl álpınızmmen aınalysqan «Kırov» áskerı-patrıottyq klýbynyń túlegi Muhıt Turdyqulov oınady.
– Jańa jyl qarsańynda balalar aýrýhanasyna barý ınstıtýt basshylyǵy men kýrsanttar úshin qalyptasqan dástúr deýge bolady. Biz balalardyń kóńil-kúıin kóterip qana qoımaı, ózimiz de demalyp qaldyq. Bul qýanysh olardyń tez saýyǵyp ketýine sep bolady dep úmittenemiz, – deıdi kýrsant Nurbek Berdish.
Aksıa densaýlyǵyna baılanysty Jańa jyldy aýrýhanada qarsy alýǵa májbúr bolǵan balalar úshin ǵajaıyp oqıǵa boldy. Balalarmen birge ata-analar da, medısına qyzmetkerleri de qýanyp qaldy. Qaıyrymdylyq aksıasyn uıymdastyrýshylar ár balanyń tezirek saýyǵyp ketýin tilep, Jańa jyldyq syılyqtar tabys etti. Quttyqtaýlardy qýana qabyldaǵan balalar da án aıtyp, óleń oqyp berdi.
