Qazaqstandaǵy balalar hırýrgıasynyń negizin qalaýshy, pedıatr-dáriger, akademık Kamal Ormantaev dúnıeden ozdy.
Bul týraly Asfendıarov atyndaǵy QazUMÝ baspasóz qyzmeti málimdedi, dep habarlaıdy aqshamnews.kz.
Akademıktiń ómirden ótkeni týraly aqparatty onyń uly Jaras Ormantaev ta rastady.
Búgin túnde ardaqty ákem, qazaqstandyq balalar hırýrgıasynyń negizin qalaýshysy - Akademık Kamal Ormantaev ómirden ozdy, - dep jazdy Jaras Ormantaev óziniń Facebook-tegi paraqshasynda.
Kamal Sarýaruly 1936 jyly Qyzylorda oblysynda dúnıege kelgen. 1953 jyly Almaty memlekettik medısına ınstıtýtynyń pedıatrıa fakúltetine túsip, medısına salasyndaǵy jolyn bastady. 1968 jyly osy ınstıtýttyń balalar hırýrgıasy kafedrasyn basqardy, bul qazaqstandyq balalar hırýrgıasynyń ǵylymı mektebiniń qalyptasýyna negiz qalady.
Qazaqstandaǵy balalar hırýrgıasynyń negizin qalaýshy, pedıatr-dáriger, medısına ǵylymdarynyń doktory, profesor, ǵylym qaıratkeri, Qazaqstan Respýblıkasy Ulttyq ǵylym akademıasynyń akademıgi, Qazaqstannyń profılaktıkalyq medısına akademıasynyń akademıgi jáne vıse-prezıdenti, 1999 jylǵy Qazaqstan Respýblıkasynyń Memlekettik syılyǵynyń laýreaty.
Óziniń aıryqsha eńbek jolynda ol 20 000-ǵa jýyq kúrdeli operasıa jasap, myńdaǵan balanyń ómirin saqtap qaldy. Onyń eńbeginiń arqasynda 1 500-den astam dáriger daıyndalyp, olardyń kópshiligi Qazaqstanda ǵana emes, shetelde de jetekshi maman atandy.