Basty maqsat – balalardyń qaýipsizdigin qamtamasyz etý.
Memleket basshysy Qasym-Jomart Toqaev balabaqshalarda búldirshinderdi uryp-soǵý jaǵdaılarynyń kóbeıip ketkenine alańdap, balabaqshalardy lısenzıalaý tártibin qaıta engizýdi tapsyrdy, dep habarlaıdy Almaty-akshamy.kz
«Jekemenshik balabaqshalarda balalardy uryp-soǵý derekteri bar. Sonymen qatar jumys istemeıtin balabaqshalarǵa qarjy bólý kóbeıip ketti. Munyń bári olardyń qyzmeti ashyq emes ekenin, azamattyq jaýapkershiligi joqtyǵyn kórsetedi. Basqasha aıtqanda, qoǵam talabyna saı emes», - dedi Prezıdent Úkimettiń keńeıtilgen otyrysynda.
Toqaev 2011 jyly balabaqshalardyń lısenzıa boıynsha jumys isteý tártibi toqtatylǵanyn eske saldy. Aıtýynsha, memleket bul qadamǵa amalsyzdan barǵan. Óıtkeni mektep jasyna deıingi balalardy balabaqshamen barynsha qamtý qajet boldy.
- Bul rette, jeke sektordyń áleýetin paıdalaný mańyzdy edi. Nátıjesinde 2 jáne 6 jas aralyǵyndaǵy balalardyń 88 paıyzdan astamy balabaqshamen qamtyldy, - dedi Memleket basshysy. - Al endi qyzmet kórsetý sapasyn arttyratyn kez keldi.
«Úkimet osy máseleni muqıat qarastyrýy kerek. Lısenzıalaý tártibin qaıta engizý, eń aldymen, memleketke emes, qoǵamǵa qajet shara. Óıtkeni basty maqsat – balalardyń qaýipsizdigin qamtamasyz etý», - dedi Toqaev.